एजेन्सी – आयरल्यान्डका स्टार अलराउन्डर तथा सर्वाधिक सफल खेलाडी केभिन ओ ब्रायनले ओडिआई करिअरबाट सन्न्यास लिएका छन् । केभीन ओ ब्रायनले शुक्रबार ओडिआई क्रिकेटबाट सन्न्यास लिएको जनाएका छन् ।

टेष्ट र टि२० आईलाई भने निरन्तरता दिने छन् । ३७ वर्षिय ब्रायनले आयरल्यान्डबाट १ सय ५३ ओडिआई खेल खेलेका छन् । ओडिआईमा उनले २ शतक र १८ अर्धशतक सहित कुल ३ हजार ६ सय १९ रन बनाएका छन् । बलिङतर्फ १ सय १४ विकेट लिएका छन् । जुन ओडिआईमा आयरल्यान्डबाट सर्वाधिक विकेट लिने बलर हुन् । ओडिआई ब्याटिङ तर्फ सर्वाधिक रन बनाउने खेलाडीमा तेस्रो स्थानमा छन् । ओडिआईमा आयरल्यान्डबाट अन्य कुनैपनि खेलाडीले एक सय विकेट लिन सकेका छैनन् ।

केभिन ओ ब्रायन एकदिवसिय विश्वकपमा सर्वाधिक छिटो बलमा शतक पुरा गर्ने ब्याट्सम्यान हुन् । उनले सन् २०११ को विश्वकपमा इंग्ल्यान्डविरुद्ध ५० बलमा शतक पुरा गर्दै कीर्तिमान रचेका थिए । ब्रायनले उक्त विश्वकपमा ६३ बलमा १३ चौका र ६ छक्का सहित १ सय १३ रन बनाएपछि आयरलयान्ड ३ विकेटले विजयी भएको थियो । उनले आफ्नो ओडिआईको पहिलो शतक २००७ मा केन्याविरुद्ध १ सय ४२ रनको इनिङ खेलेका थिए । ब्रायनले सन् २००६ मा इंग्ल्यान्डविरुद्ध डेब्यू गर्दा दुई साता अघि नेदरल्यान्ड्सविरुद्ध अन्तिम खेल खेलेका छन् ।

ब्रायनले ३ टेष्ट खेलमा १ शतक सहित २ सय ५८ रन बनाएका छन् । आयरल्यान्डबाट टेष्टमा शतक प्रहार गर्ने पहिलो खेलाडी हुन् । ९६ टि२० आईमा उनले १ हजार ६ सय ६२ रन बनाउनुको साथै ५८ विकेट लिएका छन् । तेस्रो संस्करणको एभरेष्ट प्रिमियर लिग ब्रायनले काठमाडौं किंग्स ११ बाट खेलेका थिए । जसमा ७ खेलमा १ सय ८४ रन बनाउनुको साथै उनले ९ विकेट लिएका थिए ।

केभिन ठूला सटका लागि प्रख्यात छन् । केभिनले दुई वर्षअघि हङकङविरुद्ध टि२० आई खेलमा ६२ बलमा १२ चौका र ७ छक्का सहित १ सय २४ रनको इनिङ खेलेका थिए । आयरल्यान्डलाई टेष्ट मान्यता दिलाउन केभिनको भूमिका र योगदान निकै महत्वपूर्ण रहेको छ ।