काठमाडौं (हाम्रो खेलकुद) – नेपाली राष्ट्रिय क्रिकेट टोलीले आइसिसी विश्वकप लिग–२ अन्तर्गत नेपाल, स्कटल्यान्ड र नामिबियाबीच स्पेनमा जुलाई तेस्रो साता हुने त्रिकोणात्मक ओडिआई सिरिजको लागि सोमबार देखि बन्द प्रशिक्षण सुरु गर्ने भएको छ । नेपाल क्रिकेट संघ (क्यान) ले शुक्रबार बन्द प्रशिक्षणको लागि २० सदस्य प्रारम्भिक टोली घोषणा गरेको छ ।

स्कटल्यान्डमा हुनुपर्ने उक्त सिरिज कोरोना महामारीको कारण स्पेनमा हुने बताइएको छ । टोलीका मुख्य प्रशिक्षक डेभ ह्वाटमोरको कोरोना परिक्षण (पिसिआर) नेगेटिभ आएको छ । ह्वाटमोर श्रीलंकाबाट सोमबार नेपाल आएका थिए । कोरोना महामारीको कारण नेपालको घरेलु क्रिकेट ठप्प भएपछि ह्वाटमोर वैशाख तेस्रो साता श्रीलंका फर्किएका थिए ।

चार दिनको क्वारेनटाइनमा बसेका ह्वाटमोरको पिसिआर नेगेटिभ आएको छ । क्यानका म्यानेजर विनोद दासका अनुसार शनिवार बन्द प्रशिक्षणमा बोलाईएका खेलाडीको पिसिआर परिक्षण हुने छ । सोमबारबाट टियु मैदानमा प्रशिक्षण सुरु हुने छ । स्पेन भ्रमणअघि नेपालको योजना विदेशमा गएर प्रशिक्षण गर्नुको साथै अभ्यास खेल खेल्ने भएपनि कोरोना कारण क्वारेनटाइनमा बस्नुपर्ने हुँदा कुनैपनि टोलीले नमानि रहेको दास बताउछन् ।

क्यानले विदेशमा प्रशिक्षणको लागि निरन्तर प्रयास गरि रहेको छ । यदि नेपालले कुनै टोलीसँग पनि अभ्यास खेल्ने वातावरण मिलेन भने भने स्पेनमा चाँडै गएर तयारी गर्ने छ ।

बन्द्र प्रशिक्षणमा बोलाइएको नेपाली टोली : ज्ञानेन्द्र मल्ल, कुशल भुर्तेल, आरिफ शेख, पारस खड्का, दीपेन्द्रसिंह ऐरी, आसिफ शेख, कुशल मल्ल, विनोद भण्डारी, करण केसी, सन्दीप लामिछाने, सोमपाल कामी, कमलसिंह ऐरी, अभिनाश बोहरा, सन्दीप जोरा, साहब आलम, सुशान भारी, शरद भेषावकर, विक्रम सोब, पवन सरार्फ र पृथु बास्कोटा ।