एजेन्सी – आइसिसी विश्व टेष्ट च्याम्पियनसिप फाइनलमा न्युजिल्यान्डले भारतविरुद्ध पहिला बलिङ गर्ने भएको छ । इंग्ल्यान्डको दी रोज बाउल स्टेडियम साउथह्याप्टनमा न्युजिल्यान्डका कप्तान केन विलियम्सनले टस जितेर पहिला बलिङ गर्ने निर्णय लिएका छन् ।

टेष्ट इतिहासको १ सय ४४ वर्षमा पहिलो पटक विश्व टेष्ट च्याम्पियनसिप फाइनल हुँदै छ । शुक्रबार पहिलो दिन लगातार वर्षाको कारण टस पनि हुन नपाई रद्द भएको थियो । ऐतिहासिक फाइनलमा न्युजिल्यान्डका विलियम्सनले टस जित्दै टोलीमा चार प्रमुख तीव्र गतिका बलर खेलाएको जानकारी दिएका छन् । न्युजिल्यान्ड स्पिनर विनानै फाइनल खेल्दै छ । न्युजिल्यान्डले चार तीव्र गतिका बलरमा टिम साउथी, ट्रेन्ट बोल्ट, निल वाग्रर र काईल जामिसनलाई खेलाएको छ । अलराउन्डरमा कोलिन डी ग्रान्डहोम रहेका छन् ।

भारतले आफ्नो प्लेइङ ११ मा भने परिवर्तन गरेको छैन । ६ प्रमुख ब्याट्सम्यान, तीन तीव्र गतिका बलर र दुई स्पिनर खेलाएको छ । न्युजिल्यान्डले आफ्नो टोलीमा चार तीव्र गतिका प्रमुख बलर खेलाएको छ । भारतले आइसिसी प्रतियोगितामा सन् २००३ मा एकदिवसिय कपमा जितेको थियो । अन्य सबै आइसिसीका प्रतियोगितामा न्युजिल्यान्डले भारतलाई हराउँदै आएको छ ।

आइसिसीका नौ उत्कृष्ट राष्ट्रले दुई वर्षसम्म प्रतिस्पर्धा गर्दा भारत शीर्ष र न्युजिल्यान्ड दोस्रो स्थानमा रहँदै फाइनलमा स्थान बनाएका हुन् । विश्व टेष्ट वरियतामा न्युजिल्यान्ड शीर्ष र भारत दोस्रो स्थानमा छन् ।

भारत र न्युजिल्यान्डबीच हालसम्म ५९ टेष्ट खेल भएका छन् । न्युजिल्यान्ड १२ खेलमा विजयी हुँदा २१ खेलमा पराजित भएको छ । २६ खेल बराबरीमा सकिएका छन् । पछिल्ला पाँच भेटमा भारत तीन र न्युजिल्यान्ड दुई खेलमा विजयी भएका छन् । यस फाइनलको विजेताले १.६ मिलियन डलर र उप विजेताले ८ लाख अमेरिकी डलर पाउने छन् ।

भारतको प्लेइङ ११ : रोहित शर्मा, सुभमन गिल, चेतेश्वर पुजारा, विराट कोहली (कप्तान), अजिक्या रहाने, ऋषभ पन्त (विकेटकिपर), रविचन्द्रन आश्विन, रविन्द्र जडेजा, जस्प्रित बुमराह, ईशान्त शर्मा र मोहम्मद शामी ।

न्युजिल्यान्डको प्लेइङ ११ : केन विलियम्सन (कप्तान), ट्रेन्ट बोल्ट, डेभन कन्वे, कोलिन डि ग्रान्डहोम, म्याट हेनरी, काईल जामिसन, टम लाथम, टिम साउथी, रस टेलर, निल वाग्रर, बिजे वाटलिङ (बिकेटकिपर)