एजेन्सी – आइसिसी विश्व टेष्ट च्याम्पियनसिप फाइनलमा भारतले न्युजिल्यान्डविरुद्ध दोस्रो दिनको समाप्तिमा संयमित सुरुवात गरेको छ । इंग्ल्यान्डको दी रोज बाउल स्टेडियममा टस हारेर पहिला ब्याटिङको निम्तो पाएको भारतले दोस्रो दिन ब्याड लाइटको कारण खेल ६४.४ ओभरमा सकिँदा भारतले ३ विकेट गुमाउँदै १ सय ४६ रन बनाएको छ ।

पहिलो दिन टस हुन नपाई खेल सकिएको थियो । कप्तान विराट कोहलीले संयमित ब्याटिङ गर्दै १ सय २४ बलमा १ चौका सहित ४४ रनमा अविजित छन् । उपकप्तान अजिंक्या रहाणे ७९ बलमा ४ चौका सहित २९ रनमा अविजित छन् । चौथो विकेटका लागि कोहली र रहाणेले १ सय ४७ बलमा ५८ रनको साझेदारी गरेका छन् ।

ओपनर रोहित शर्मा र सुभमन गिलले भारतलाई पहिलो विकेटका लागि २०.१ ओभरमा ६२ रन जोड्दै सुरुवात दिलाएका थिए । तीव्र गतिका बलर काईल जामिसनले रोहितलाई स्लिपमा टिम साउथीबाट ३४ रनमा उत्कृष्ट क्याच गराउँदै पहिलो सफलता दिलाए । रोहितको विकेट पछि न्युजिल्यान्डले खेलमा राम्रो पूनरागमन गर्न सफल भयो ।

रोहितले ६८ बलमा ६ चौका प्रहार गरे । २५ औं ओभरको तेस्रो बलमा तीव्र गतिका बलर निल वाग्ररको बलमा एज लागेर गिल २८ रनमा विकेटकिपर बिजे वाटलिङबाट क्याच आउट हुन पुगे । गिलले ६४ बलमा ३ चौका प्रहार गरे । ४१ औं ओभरको दोस्रो बलमा अर्का तीव्र गतिका बलर ट्रेन्ट बोल्टले प्रमुख ब्याट्सम्यान चेतेश्वर पुजारालाई ८ रनमा एलबिडब्लू आउट गर्दै भारतमाथि दबाब बढाए । पुजारालाई खाता खोल्न ३६ बल लागेको थियो । पुजाराले ५४ बल खेल्दै २ चौका प्रहार गरे ।