काठमाडौं (हाम्रो खेलकुद) – नेपाली राष्ट्रिय क्रिकेट टोलीले सोमबारदेखि अर्को महिना स्पेनमा हुने आइसिसी विश्वकप लिग–२ अन्तर्गत स्कटल्यान्ड र नामिबियासँग त्रिकोणात्मक ओडिआई सिरिजको लागि बन्द प्रशिक्षण सुरु गर्दैछ ।

क्यानले २० सदस्य टोली बन्द प्रशिक्षणमा बोलाएको छ । पहिलो पटक स्पेनमा खेल्न लागेको नेपालका विपक्षी टोली पनि बलिया छन् । नयाँ ठाउँमा नेपाललाई चुनौती हुने राष्ट्रिय टोलीका कप्तान ज्ञानेन्द्र मल्ल बताउछन् । ‘घोषणा टोली राम्रो छ । ब्याट्सम्यान, स्पिनर, मिडियम पेश सबै पोजिसनमा विकल्प पनि छ’, ज्ञानेन्द्रले हाम्रो खेलकुदसँग कुरा गर्दै भने ।

‘स्पेनको विकेटको हिसाबले हेर्ने हो भने हामीलाई केहि थाहा छैन । कहिल्यै खेलेको छैन । त्यो लेभलको खेल त्यहाँ भएको पनि छैन । हामीले यूरोपियन देशमा जस्तो सोचि रहेका छौं । तर सोचे भन्दा फरक हुन्छ जस्तो लाग्छ’, ज्ञानेन्द्रले भने ।

त्यसैमा उनले थपे, ‘ मुख्य चुनौती भने विपक्षी टोली राम्रा छन् । स्कटल्यान्डको बारे भन्न पर्दैन । विश्वकप अनुभव देखि एसोसियटमा लगातार उत्कृष्ट प्रदर्शन गर्दै आएको छ । नामिबियाले पनि पछिल्लो समय राम्रो खेलि राखेको छ । नयाँ ठाउँमा हामीहरुलाई चुनौतीपूर्णनै हुन्छ होला । विपक्षी टोली बलिया हुँदा हामीले धेरै मिहिनेत गर्नुपर्ने हुन्छ ।’

नेपालले गत वैशाखमा घरेलु मैदानमा नेदरल्यान्ड्स र मलेसियासँग त्रिकोणात्मक टि२० आई सिरिजमा उत्कृष्ट ब्याटिङका साथ उपाधि जितेको थियो । नेपाली टोलीबाट समर्थक र सुभचिन्तको अपेक्षा र आशा पनि स्पेन भ्रमणमा त्यस्तै उच्च छ ।

ज्ञानेन्द्र टि२० पुरै फरक शैली भएको बताउँछन् । ‘एकदिवसिय खेल अलि फरक हुन्छ । एकदिवसियमा टि२० मा जस्तो आक्रामकले मात्र हुँदैन । सबै कुराहरु चाहिँन्छ । हामी ओडिआई खेलहरु कम खेलेको हुँदा आफैको लागि चुनौती हो जस्तो लाग्छ । तर पछिल्लो समय जुन तरिकाले टोली बनेको छ र युवा खेलाडीहरुले पनि राम्रो खेलि रहेका छन् । जसले गर्दा पनि हामीले राम्रो गर्नेमा र्छौ जस्तो लाग्छ’, उनले भने ।

नेपालले सोमबारबाट बन्द प्रशिक्षण थाल्ने छ । तर नेपालमा मनसुन सुरु भइसकेको छ । नेपाली टोलीले बन्द प्रशिक्षणमा फिटनेसमा बढी जोड दिने छ । मैदानमा पाएसम्म धेरै समय बिताउन प्रयास गर्ने ज्ञानेन्द्र बताउँछन् ।