न्युजिल्यान्डले अघिल्लो साता विश्व टेस्ट च्याम्पियनसिप फाइनलमा विश्व क्रिकेटको पावर हाउस भारतलाई ८ विकेटले हराउँदै इतिहास रच्न सफल भयो । न्युजिल्यान्डले दुईदशक देखिको आइसिसी उपाधि खडेरीमा ब्रेक लगायो ।

न्युजिल्यान्डलाई उपाधि जिताउन २९ वर्षिय बायाँ हाते ब्याट्सम्यान डेभन कन्वेको योगदान पनि महत्वपूर्ण थियो । कन्वेले आफ्नो करिअरको तेस्रो टेस्ट खेलमै उपाधिका साथ नयाँ इतिहास रच्न सफल भए । उनले पहिलो इनिङमा १ सय ५३ बलमा ६ चौका सहित ५४ रनका साथ भारतीय बलरको डटेर सामना गर्दै टोलीलाई मजबुत अवस्थामा राखे । टेस्ट च्याम्पियनसिप फाइनलमा अर्धशतक बनाउने उनी पहिलो खेलाडी बने । पहिलो इनिङमा अर्धशतक प्रहार गर्ने उनी एक्लो ब्याट्सम्यान थिए । दोस्रो इनिङमा कन्वेले १९ रन जोड्दै आउट भए । कन्वेले दुई साता अघि अर्थात जुन २ मा इंग्ल्यान्डविरुद्ध लर्ड्समा टेस्टमा डेब्यू गर्दै सानदार दोहोरो शतकीय इनिङ खेलेका थिए ।

इंग्ल्यान्डको घरेलु मैदान, टेस्टका सर्वाधिक सफल तीव्र गतिका बलर जेम्स एन्डरसन र स्टुर्अ ब्रोडको विरुद्ध डेब्यूमै दोहोरो शतक प्रहार गर्नु सामान्य कुरा होईन । त्यसको लागि क्षमतासँगै धैर्यता चाहिन्छ । सिमित ओभरमा उत्कृष्ट प्रभाव छाडेपछि न्युजिल्यान्डको छनोट समितिले टेस्टमा मौका दिएको थियो । उनको घरेलु प्रतियोगिता प्रदर्शन अझ लोभ लाग्दो छ । घरेलुको लयलाई अन्तर्राष्ट्रियमा पनि निरन्तरता दिँदै आएका छन् ।

कन्वेले गत नोभेम्बरमा वेस्ट इन्डिजविरुद्ध टि२० आईमा डेब्यू गरेका थिए । उक्त खेलमा ४१ र दोस्रो खेलमा ६५ रनको अविजित इनिङ खेल्दै नयाँ आशा देखाएका थिए । फेब्रुअरीमा कन्वेले अष्ट्रेलियाविरुद्ध ओपनर मार्टिन गुप्टिल शून्य, टिम सिफर्ट एक र केन विलियम्सन १२ रनमा आउट हुँदै खराब सुरुवात गरेको अवस्थामा ९९ रनको अविजित इनिङ खेल्दै प्लेयर अफ द म्याच चुनिएका थिए । कठिन समयको त्यो प्रदर्शनले उनको उचाई र चर्चा थप चुलियो ।

टि२० मा सानदार प्रदर्शनपछि बंगलादेशविरुद्ध २०२१ मार्चमा ओडिआईमा डेब्यू गरे । डेब्यू खेलमा कन्वे २७ रनमा क्याच आउट भएका थिए । बंगलादेशविरुद्ध दोस्रो खेलमा ७२ रन र तेस्रो खेलमा १ सय २६ रनको सानदार शतकीय इनिङका साथ आफ्नो प्रभाव विश्व क्रिकेटमा पनि देखाउन थाले । कन्वे प्लेयर अफ द म्याच र सिरिज चुनिए ।

कन्वेको अन्तर्राष्ट्रिय क्रिकेटमा प्रदर्शन सानदार छ र त्यसको पछाडि उनको मिहिनेत र त्यागको कथा प्रेरणादायी छ । कन्वे यो स्तरमा आउन आफ्नो देश दक्षिण अफ्रिकानै छाड्नु परेको छ । देश छाड्ने निर्णयले उनको क्रिकेट प्रतिको भोक, कला, क्षमता र सपना अनुमान गर्न सकिन्छ ।

कन्वेको बाल्यकाल

कन्वेको जन्म १९९१ जुलाई ८ मा दक्षिण अफ्रिका जोहान्सबर्गमा भएको हो । उनको पिताको नाम डेन्टन र आमा सान्डे कन्वे हो । उनको पूरा नाम डेभन फिलिप कन्वे हो । डेभन कन्वेका दुई दिदीहरु छन् । कन्वेका पिता फुटबल प्रशिक्षक हुन् । उनको बाल्यकालमा दक्षिण अफ्रिमा ग्रिम स्मिथ, मार्क बाउचर, एबि डिभिलियर्स, ज्याक क्यालिस जस्ता विश्व प्रसिद्ध क्रिकेटरबाट निकै प्रभावित थिए । स्कुल, घर कलेज, क्लब हुँदै उनको बाल्यकाल क्रिकेटमा वित्यो । विस्तारै व्यावसायिक यात्रातर्फ अघि बढ्न थाले ।

२००९ मा मार्चमा दक्षिण अफ्रिका प्रथम श्रेणी मान्त्यता प्राप्त प्रदेश स्तरिय प्रतियोगिता थ्रि डे च्यालेन्ज प्रतियोगिता गाउटेङबाट डेब्यू गरेका थिए । पहिलो इनिङमा उनी शून्य र दोस्रोमा १० रनमा आउट भएका थिए । त्यसै वर्ष फेब्रुअरीमा बोल्यान्डविरुद्ध लिष्ट ए मा डेब्यू गरे । २०११ फेब्रुअरीमा डल्फिन्सबाट नाइट्सविरुद्ध कन्वेले टि२० मा डेब्यू गर्दै तीनै शैलीको घरेलु प्रतियोगिता खेले । लगातार घरेलु प्रतियोगिता खेल्दै उनको क्षमता पनि निखारीदै गयो । कन्वे सुरुवातलाई ठूलो इनिङमा बदल्न संघर्ष गरि रहेका थिए ।

कन्वेले २०१५ मा अफ्रिका टि२० कप प्रतियोगिता खेल्दै ३ खेलमा ५३ रन बनाए । जुन प्रतियोगिता जिम्बावे ११ सँगै दक्षिण अफ्रिका प्रमुख खेलाडी खेलेका थिए । कन्वेले थप मिहिनेत गरे । २०१६/१७ को घरेलु क्रिकेटमा कन्वेले प्रदर्शन सानदार रह्यो । प्रथम श्रेणीको घरेलु प्रतियोगितामा कन्वेले ७ खेलमा ४ शतक र २ अर्धशतक सहित कुल ८ सय २० रन बनाउँदै सर्वाधिक रन बनाउने सूचिमा दोस्रो स्थानमा रहे । मार्च २३ मा बोर्डरविरुद्ध ३ सय १ बलमा २५ चौका सहित २ सय ५ रनको सानदार दोहोरो शतकीय इनिङ खेलेका थिए । जुन उनको पहिलो दोहोरो शतक थियो । आफ्नो सानदार प्रदर्शनपछि पनि दक्षिण अफ्रिका टोलीमा परेनन् ।

लगातार प्रयास गरेपनि दक्षिण अफ्रिका टोलीमा स्थान बनाउन सकेनन् । उच्च प्रतिस्पर्धा र राम्रो प्रदर्शन गरेको समयमा पनि नपरेपछि आफ्नो भविष्य दक्षिण अफ्रिका क्रिकेटमा देख्न सकेनन् । दक्षिण अफ्रिकामा कोटा प्रणालीका पनि उनले भविष्य उज्ज्वल देखेनन् । त्यसपछि कन्वेले दक्षिण अफ्रिकानै छाड्ने निर्णय लिए । कन्वेसँग दुई विकल्प थिए । इंग्ल्यान्ड वा न्युजिल्यान्डमा गएर खेल्ने । न्युजिल्यान्डमा कन्वेको साथी हुँदा उनले उतैबाट क्रिकेट खेल्ने निर्णय लिए ।

सन् २०१७ अगष्टमा दक्षिण अफ्रिका छाडेर न्युजिल्यान्ड लागे । उनले दक्षिण अफ्रिकामा भएको आफ्नो सबै सम्पती बेचेर स्टार क्रिकेटर बन्ने सपनाका साथ न्युजिल्यान्ड छिरेका थिए । जुन चार वर्षपछि पूरा भएको छ । क्रिकेटर बन्न जन्मथलो नै छाडेका कन्वेले अन्तर्राष्ट्रिय क्रिकेटमा सानदार सुरुवात गरेका छन् ।

न्युजिल्यान्डमा सर्वोत्कृष्ट प्रदर्शन

आइसिसीको नियम अनुसार तीन वर्ष सम्म उनले न्युजिल्यान्डको टोलीबाट खेल्न पाउँदैन थिए । २०२० अगष्ट सम्म उनले पर्खनु पर्ने हुन्थ्यो । न्युजिल्यान्डको टोलीमा पर्न पहिला घरेलु क्रिकेटमा उच्च प्रदर्शन गर्नु पर्दथ्यो । २०१८/१९ को प्लन्केट शिल्ड (प्रथम श्रेणी) सिजन प्रतियोगिता वेलिंग्टनबाट प्रतिनिधित्व गर्ने अवसर पाए । कन्वेले ७ खेलमा ६ सय ५९ रनका साथ प्रतियोगिता सर्वाधिक रन बनाउने खेलाडी बने ।

जसक्रममा २ सय ३ रनको अविजित दोहोरो शतकीय इनिङ खेलेका थिए । त्यसै सिजनमा न्युजिल्यान्डको सर्वाधिक ठूलो घरेलु टि२० प्रतियोगिता सुपर स्याम्श वेलिंग्टनबाट खेल्दै ९ खेलमा एक शतक सहित ३ सय ६३ रन बनाउँदै शीर्ष स्थानमा रहे । छनोट समिति उनको प्रदर्शनबाट प्रभावित बनि सकेको थियो । कन्वेलाई २०१९ मार्चमा न्युजिल्यान्ड क्रिकेट बोर्डले त्यस वर्ष घरेलु प्रतियोगिता सर्वोत्कृष्ट खेलाडीको अर्वाडले सम्मानित गर्यो ।

२०१९/२० प्रथम श्रेणीको खेलमा कन्वे थप प्रभावशाली प्रदर्शन गरे । कन्वेले क्यान्टरबरीविरुद्ध ३ सय ५२ बलमा ४८ चौका र ५ छक्का सहित ३ सय २७ रनको अविजित तेहोरो शतक प्रहार गरेका थिए । दोस्रो इनिङमा ६६ रन बनाउँदै कुल एकै खेलमा ३ सय ९३ रन बनाउँदै न्युजिल्यान्डमा सनसनी मच्चाए । जुन न्युजिल्यान्डबाट प्रथम श्रेणीको एक खेलमा बनेको सर्वाधिक धेरै रन थियो । उक्त प्रतियोगितामा कन्वेले ६ खेलमा ७ सय १ रनका साथ शीर्ष स्थानमा रहे । २०१९/२० को सुपर स्याम्शमा उनले ११ खेलमा १ शतक सहित ५ सय ४३ रनका साथ शीर्ष स्थानमै रहे ।

२०१९/२० सिजनमै न्युजिल्यान्डको लिष्ट ए प्राप्त घरेलु प्रतियोगिता फ्रर्ड ट्रफीमा पनि १० खेलमा ५ सय ५३ रनका साथ शीर्ष स्थानमा रहँदै न्युजिल्यान्डको ढोका सहज बनाएका थिए । २०२० मा पनि कन्वे त्यस वर्ष सर्वोत्कृष्ट घरेलु क्रिकेटरको अवार्ड पाए । २०२० नोभेम्बरमा कन्वे न्युजिल्यान्डको ए टोलीमा परेका थिए । त्यसै महिना उनी न्युजिल्यान्डको टि२० आई टोलीमा पर्दै नोभेम्बर २७ मा डेब्यू गरेका थिए ।

गलफ्रेन्डको ठूलो साथ

कन्वे न्युजिल्यान्डमा स्थापित हुन उनी गलफ्रेन्ड किम वाटसनको ठूलो हात र साथ छ । किम गल्फ खेलाडी हुन् । कन्वे फुर्सदको समयमा उनीसँगै गल्फ खेल्न जान्छन् । कन्वेले न्युजिल्यान्ड रोज्नुको मुख्य कारण पनि किमनै थिइन् । यी दुईले अघिल्लो वर्ष इन्गेजमेन्ट गरिसकेका छन् । उनको साथ र सहयोगलेनै उनको सपना पूरा गर्न सहज भयो ।

कन्वेले देखाएको नयाँ आशा

केन विलियम्सनको नेतृत्वमा न्युजिल्यान्डले पछिल्लो तीनै शैलीमा सर्वोत्कृष्ट प्रदर्शन गरेको छ । टेस्ट र ओडिआई वरियतामा शीर्ष र टि२० आईमा तेस्रो स्थानमा छ । कन्वे बायाँ हाते खेलाडीको साथै पार्टटाइम विकेटकिपर समेत हुन् । कन्वेको आगमनले न्युजिल्यान्डको शीर्षक्रम थप मजबुत बनेको छ । न्युजिल्यान्डमा तीनै शैलीको क्रिकेट खेल्ने थोरै खेलाडी छन् । कन्वे तीनै शैलीमा अब्बल खेलाडीमा पर्दछन् ।

उनको ब्याटिङमा क्लास छ । क्रिकेटको भोक र मनमा इख छ । जो कोहि उनको क्लासबाट प्रभावित हुन्छ । ब्याटिङमा क्लाससँगै धैर्यता, संयमित र त्यो भन्दा बढी जिम्मेवारी छ । आगमी दिनमा कन्वेले न्युजिल्यान्डलाई आफ्नो उत्कृष्ट प्रदर्शनको सहयोगले थप नयाँ उचाईमा लैजान सक्ने आशा र विश्वास गरिएको छ ।

एजेन्सीको सहयोगमा भूपेन्द्र जिसीको प्रस्तुति