एजेन्सी – श्रीलंका र इंग्ल्यान्डबीचको तेस्रो तथा अन्तिम ओडिआई खेल वर्षाको कारण रद्द भएको छ । योसँगै तीन ओडिआई खेलको सिरिज घरेलु टोली इंग्ल्यान्डले २-० ले जितेको छ । तेस्रो तथा अन्तिम ओडिआई खेलमा इंग्ल्यान्डले दोस्रो इनिङमा लक्ष्य पछ्याउनेक्रममा वर्षाको कारण खेल रोकिएको थियो । लगातार वर्षाको कारण खेलनै रद्द हुन पुग्यो ।

त्यसअघि ब्रिस्टोलमा टस हारेर ब्याटिङ थालेको श्रीलंका ४१.१ ओभरमा १ सय ६६ रनमा अल आउट भएको थियो । श्रीलंका तल्लोक्रमका दसुन शनकाले सर्वाधिक ६५ बलमा समान २ चौका र छक्का सहित ४८ रनमा अविजित रहे । अन्य कुनैपनि ब्याट्सम्यानले राम्रो प्रदर्शन गर्न सकेनन् ।

खराब लयबाट गुज्रि रहेको श्रीलंका तेस्रो खेलमा पनि ब्याटिङ चल्न सकेन । तेस्रो ओभरको दोस्रो बलमा क्रिस वोक्सले कप्तान कुसल पेरेरालाई ९ रनमा बोल्ड आउट गरे । छैटौं ओभरको पहिलो बलमा डेविड विल्लीले अविष्का फ्रेनान्डोलाई १४ रनमा एलबिडब्लू आउट गरेका थिए । विल्लीलेनै पाथुम निसंकालाई जोनी बेयरस्टोबाट ६ रनमा क्याच आउट गराए ।

दोस्रो खेलमा राम्रो ब्याटिङ गरेको धनञ्जय डि शिल्भा क्रिस वोक्सको बलमा आदिल राशिदबाट ४ रनमा क्याच आउट हुँदा श्रीलंका ८.५ ओभरमा ४२–४ को दयनिय अवस्थामा पुगेको थियो । त्यसपछि टम करनले एकपछि अर्को गर्दै चार विकेट लिएपछि श्रीलंका संकटमा परेको थियो ।

वानिन्दु हसरंगा ३३ बलमा १ चौका सहित २० रनमा विल्लीबाट क्याच आउट भए । ओशादा फ्रेनान्डो १८, चामिका करुणारत्ने ११ र बिनुरा फ्रेनान्डो ७ रनमा क्याच आउट हुँदा श्रीलंका ३१.५ ओभरमा १२४–८ को अवस्थामा पुगेको थियो । आदिल राशिदले दुश्मन्था चामिरालाई १६ रनमा स्टम्पिङ आउट गराए ।

इंग्ल्यान्डका टम करनले ओभरमा १० ओभरमा ३५ रन खर्चेर ४ विकेट लिए । क्रिस वोक्सले १० ओभरमा ३ मेडन सहित २८ रन खर्चेर २ विकेट लिए । डेविड विल्लीले २ र आदिल राशिदले १ विकेट लिए । पहिलो खेलमा इंग्ल्यान्ड ५ विकेट र दोस्रो खेलमा ८ विकेटले विजयी भएको थियो । तीव्र गतिका बलर डेविड विल्ली प्लेयर अफ द सिरिज चुनिए । विल्लीले ३ खेलमा ९ विकेट लिएका थिए ।

इंग्ल्यान्डले अव पाकिस्तानसँग घरेलु मैदानमा समान तीन ओडिआई र टि२० आई सिरिज खेल्ने छ । पहिलो ओडिआई खेल विहिबार हुने छ । श्रीलंकाले भारतसँग घरेलु मैदानमा समान तीन टि२० आई र ओडिआई सिरिज खेल्ने कार्यक्रम छ । भारत र श्रीलंकाबीच पहिलो ओडिआई मंगलबार हुने छ ।