एजेन्सी – अफगानिस्तान क्रिकेट बोर्डले युवा लेग स्पिनर राशिद खानलाई टि२० आईको कप्तानमा नियुक्त गरेको छ । अफगानिस्तानले मंगलबार राशिदलाई कप्तान र ब्याट्सम्यान नजिबउल्लाह जद्रानलाई उपकप्तानमा नियुक्त गरेको जानकारी दिएको छ ।

अफगानिस्तान क्रिकेट बोर्डका अध्यक्ष फरहान यूसुफजईले आगमी अक्टोबर नोभेम्बरमा यूएई र ओमानमा हुने टि२० विश्वकपलाई लक्षित गर्दै राशिदलाई कप्तानी जिम्मेवारी दिएको जनाएका छन् । राशिदले यसअघिनै अफगानिस्तानको तीनै शैलीमा कप्तानी गरि सकेका छन् । राशिदले २०१९ मा ७ टि२० आई खेलमा कप्तानी गर्दा ४ मा जित र ३ मा हार दिलाएका थिए । राशिदले २०१९ सेप्टेम्बरमा २० वर्षको उमेरमा कप्तानी गरेका थिए । पछिल्लो समय अफगानिस्तान क्रिकेट आन्तरिक राजनीतिको कारण कप्तान परिवर्तन गर्दै आएको छ । यसअघि अस्गर अफगान अफगानिस्तानका कप्तान थिए ।

राशिदको कप्तानीमा अफगानिस्तानले २०१९ सेप्टेम्बरमा बंगलादेशलाई टेस्टमा २ सय २४ रनको फराकिलो अन्तरले पराजित गरेको थियो । २०१९ मा तीनै शैलीमा कप्तानीको जिम्मेवारी पाएका राशिदलाई डिसेम्बरमा हटाउँदै पुन अस्गर अफगानलाई नियुक्त गरेको थियो । राशिदले ५१ टि२० आई खेलमा ९५ विकेट लिई सकेका छन् । उनले २ सय ६५ टि२० आई खेलमा ३ सय ७० विकेट लिएका छन् ।