एजेन्सी – बंगलादेशका विकेटकिपर ब्याट्सम्यान लिटन दास जिम्बावेविरुद्ध पहिलो टेस्ट खेलमा शतक बनाउन चुकेका छन् । हरारे स्पोर्ट्स क्लबमा टस जितेर ब्याटिङ थालेको पाहुना टोली बंगलादेशले पहिलो दिनको समाप्तिमा २९४–८ को अवस्थामा छ ।

बंगलादेशका महमुदूल्लाह रियाद १ सय ४१ बलमा ५ चौका सहित ५४ रनमा अविजित छन् । तस्किन अहमद १३ रनबाट साथ दिने छन् । लिटन दास १ सय ४७ बलमा १३ चौका सहित ९५ रनमा क्याच आउट भए । दास आफ्नो टेस्ट करिअरको पहिलो शतक बनाउन पाँच रनले चुकेका हुन् । तीव्र गतिका बलर डोनाल्ड तिरिपानोको ७९ औं ओभरको पहिलो बलमा फाइन लेगमा भिक्टर न्याउचीले डाइभ हान्दै उत्कृष्ट क्याच लिएपछि शतकको सपना अधुरै बनेको थियो ।

कप्तान मोमिनुल हक ९२ बलमा १३ चौका सहित ७० रनमा क्याच आउट भए । शद्मान ईस्लाम २३, मुश्फिकुर रहिम ११ र सकिब अल हसन तीन रनमा आउट भए । एक सयम १३२–६ को कमजोर अवस्थामा पुगेको बंगलादेशलाई सातौं विकेटका लागि लिटन दास र महमुदूल्लाह रियादले १ सय ३८ रनको उत्कृष्ट शतकीय साझेदारी गरेका थिए ।

जिम्बावेका तीव्र गतिका युवा बलर ब्लेसिङ मुर्जाबानीले सर्वाधिक तीन विकेट लिएका छन् । डोनाल्ड तिरिपानो र भिक्टर न्याउचीले दुई दुई विकेट लिएका छन् ।