एजेन्सी – विश्वका स्टार अलराउन्डर बेन स्टोक्स इंग्ल्यान्डका ओडिआई क्रिकेट टोलीको कप्तानी गर्ने ३४ औं कप्तान बन्दै छन् । आज (बिहिबार) पाकिस्तानविरुद्ध तीन ओडिआई सिरिज अन्तर्गत पहिलो खेलमा बाबर आजमसँगै टसको लागि कार्डिफमा मैदान उतर्दा स्टोक्स इंग्ल्यान्डको ३४ औं कप्तान बन्ने छन् ।

खेल नेपाली समय अनुसार बेलुका ५ : ४५ मा सफिया गार्डेन्स कार्डिफमा सुरु हुने छ । तीन खेलाडी र चार अफिसलमा कोरोना देखिएपनि ओईन मोर्गन सहित पहिला घोषणा सबै टोली आइसोलेसनमा बसेको छ । इंग्ल्यान्डले पहिलो रोजाईका खेलाडी सेल्फ आइसोलेसनमा बसेपछि दोस्रो रोजाईका १८ सदस्य टोली घोषणा गरेको थियो । नौ अनक्याप्ड खेलाडी छन् ।

इंग्ल्यान्डको ओडिआई खेलमा कप्तानी गर्ने पहिलो खेलाडी रे इलिंगवर्थ हुन् । ओईन मोर्गन इंग्ल्यान्डको ओडिआई खेलमा एक सय भन्दा बढी कप्तानी गर्ने एक्लो खेलाडी हुन् । २०११ देखि कप्तानी गर्दै आएका मोर्गनले १ सय २१ खेलमा ७२ मा जित र ४० मा हार बेहोरेका छन् । मोर्गनपछि एलिष्टर कुकले सर्वाधिक ६९ खेलमा कप्तानी गरेका छन् । कुकले २०१० देखि २०१४ सम्म ६९ खेलमा कप्तानी गर्दा ३६ मा जित र ३० मा हार बेहोरेका छन् । मोर्गनको कप्तानीमा इंग्ल्यान्डले पहिलो पटक २०१९ मा विश्वकप जितेको थियो ।

स्टोक्सले सिमित ओभरको क्रिकेटमा पहिलो पटक कप्तानी गर्न लागेका हुन् । टेस्टमा भने गतवर्ष वेस्ट इन्डिजविरुद्ध गरेका थिए । स्टोक्स र जस बटलरलाई मोर्गनपछिको सिमित ओभरको कप्तानको दाबेदारको रुपमा हेरिदै आएको छ । बटलरले कप्तानी गरि सकेका छन् । युवा खेलाडीले भोरिएको इंग्ल्यान्डको कप्तानी गर्न स्टोक्सलाई सहज भने हुने छैन ।