एजेन्सी – इंग्ल्यान्ड र पाकिस्तानबीचको पहिलो ओडिआई खेल आज हुँदै छ । खेल नेपाली समय अनुसार बेलुका ५ : ४५ पछि कार्डिफमा सुरु हुने छ । तीन ओडिआई सिरिजमा पाकिस्तान विजयी सुरुवात गर्न चाहन्छ । यता घरेलु टोली इंग्ल्यान्ड युवा खेलाडीको उत्कृष्ट प्रदर्शनका साथ जित निकाल्ने सोचमा छ । पाकिस्तानको बाबर आजम र इंग्ल्यान्डको बेन स्टोक्सले कप्तानी गर्ने छन् ।

घरेलु टोली इंग्ल्यान्डको नयाँ स्वरुप छ । ओईन मोर्गनको कप्तानीमा घोषणा टोली मध्य तीन सदस्य खेलाडीमा कोरोना देखिएपछि इंग्ल्यान्डले पुरै नयाँ टोली घोषणा गरेको थियो । नौ अनक्याप्ड खेलाडी छन् । बेन स्टोक्स बाहेक अन्य खेलाडीमा ओडिआईको अनुभवको कमी छ । इंग्ल्यान्ड कप्तान स्टोक्समा बढी निर्भर छ ।

इंग्ल्यान्डको ओपनिङ जेम्स भिन्स र ज्याक क्रलीले गर्ने सम्भावना छ । भिन्सले इंग्ल्यान्डबाट १६ ओडिआई खेल खेलि सकेका छन् । क्रलीले टेस्टमा राम्रो प्रदर्शन गर्दै आएका छन् । टेस्टमा मध्यक्रममा ब्याटिङ गर्नेक्रलीले ओडिआईमा डेब्यूका साथ ओपनिङ गर्ने सम्भावना छ । क्रलीको स्थानमा पिलिप साल्ट विकल्प पनि छन् । फिलिप घरेलु र फ्रेन्चाइज लिगमा आक्रामक ओपनरको रुपमा परिचित छन् । तेस्रो नम्बरमा डेविड मलान रहने छन् । टि२० आई विश्व वरियता शीर्ष स्थानका ब्याट्सम्यान मलानको प्रदर्शन निकै महत्वपूर्ण हुने छ । कप्तान बेन स्टोक्सले चौथो नम्बर सम्हाल्ने छन् । स्टोक्सको प्रदर्शनमा इंग्ल्यान्ड धेरै निर्भर हुने छ ।

पाँचौ नम्बरमा ड्यान लरेन्सको सम्भावना छ । टेस्टमा राम्रो छाप छाडेका लरेन्स पार्टटाइम स्पिन विकल्प समेत हुन् । विकेटकिपरको रुपमा बेन डकेट खेल्ने छन् । बेन डकेटले तीन ओडिआई खेलि सकेका छन् । २०१६ पछि पूनरागमन गर्न लागेका डकेट अवसर भरपूर्ण सदुपयोग गर्न चाहन्छन् । विकेटकिपरमा जोन सिम्पसन विकल्पमा छन् ।

तर उनको घरेलु प्रदर्शन पछिल्लो समय त्यति राम्रो छैन । जसको कारण डकेट पहिलो रोजाईमा खेल्ने देखिन्छ । अलराउन्डरको रुपमा लुईस ग्रेगरी खेल्ने छन् । मध्यगतिका बलर उनले तल्लोक्रममा राम्रो ब्याटिङको क्षमता राख्छन् । ज्याक बेल, सकिब मोहम्मद र क्रेग ओभरटनलाई तीव्र गतिको बलरमा खेलाउने सम्भावना छ । यी तीनै खेलाडीले ओडिआई खेल खेलि सकेका छन् । स्पिनरमा ड्यानी ब्रिग्सको सम्भावना बढी छ ।

पाकिस्तानको ओपनिङ इमाम उल हक र फखर जमानले गर्ने छन् । जमान उत्कृष्ट लयमा छन् । गत अप्रिलमा दक्षिण अफ्रिकाविरुद्ध दोस्रो ओडिआईमा १ सय ९३ र तेस्रो ओडिआईमा १ सय १ रनको उत्कृष्ट शतकीय इनिङ खेलेका थिए । तेस्रो नम्बरमा कप्तान बाबर आजमले गर्ने छन् । बाबर पाकिस्तानका मुख्य हतियार हुन् । उनको लय र पछिल्लो समय सिमित ओभरको प्रदर्शन उत्कृष्ट छ । बाबरलाई रोक्न इंग्ल्यान्डको युवा टोलीलाई कठिन पर्न सक्छ ।

विकेटकिपर मोहम्मद रिजवानले पनि लगातार उत्कृष्ट प्रदर्शन गर्दै आएका छन् । तल्लोक्रम पाकिस्तानको केहि कमजोर रहेको छ । पाकिस्तान प्रिमियर लिग २०२१ का सर्वोत्कृष्ट खेलाडी सोहिब मकसूद तल्लोक्रम सम्हाल्ने छन् । शादब खान अलराउन्डरको रुपमा खेल्ने छन् । तल्लोक्रममा शादब राम्रो ब्याटिङको क्षमता राख्छन् । तीव्र गतिको बलरमा हसन अली, शाहिन अफ्रिदी, फहिम अशरफ र हरिस रौफको सम्भावना छ । हसन र अशरफ तल्लोक्रममा आक्रामक सटको क्षमता राख्छन् । साउद शकिलले डेब्यू गर्ने सम्भावना छ । उनले स्पिनसँगै फिनिसरको रुपमा परिचित छन् ।

हेड टु हेड :

पाकिस्तान र इंग्ल्यान्डबीच हालसम्म ८८ ओडिआई खेल भएको छ । पाकिस्तान ३२ खेलमा विजयी हुँदा ५३ खेल गुमाएको छ । पछिल्ला पाँच भेटमा इंग्ल्यान्ड चार खेलमा विजयी हुँदा एक खेलमा पराजित भएको छ । २०१९ को विश्वकपपछि ओडिआईमा पहिलो पटक प्रतिस्पर्धा गर्न लागेका हुन् । उक्त खेलमा पाकिस्तान १४ रनले विजयी भएको थियो ।

पाकिस्तानको नजर शीर्ष स्थान

आइसिसी विश्वकप सुपर लिग अंक तालिकामा पाकिस्तानलाई शीर्ष स्थानमा उक्लिने अवसर छ । पाकिस्तानले इंग्ल्यान्डमाथि सिरिज क्लिनस्विप गर्न सके ३० अंक बटुल्ने छ । एक खेल जितको १० अंक मिल्ने गर्दछ । सुपर लिगमा पाकिस्तान ६ खेलमा ४ मा जित र २ मा हार सहित ४० अंकका साथ तेस्रो स्थानमा छ । बंगलादेश ९ खेलमा ५ मा जित र ४ मा हार सहित ५० अंकका साथ दोस्रो स्थानमा छ । इंग्ल्यान्ड १२ खेलमा ६ मा जित, ५ मा हार र एक रद्द हुँदा ६५ अंकका साथ शीर्ष स्थानमा छ ।