एजेन्सी – तल्लोक्रमका ब्याट्सम्यान महमूदुल्लाह रियादको सानदार शतकसँगै बंगलादेशले जिम्बावेविरुद्ध एकमात्र टेस्ट खेलमा विशाल अग्रता लिएको छ । दोस्रो दिनको समाप्तिमा बंगलादेशले पहिलो इनिङमा ३ सय ५४ रनको फराकिलो अग्रता लिएको छ ।

हरारे स्पोर्ट्स क्लबमा टस जितेर ब्याटिङ रोजेको बंगलादेश दोस्रो दिन १ सय २६ ओभरमा ४ सय ६८ रनमा अल आउट भयो । महमूदुल्लाह २ सय ७८ बलमा १७ चौका र १ छक्का सहित १ सय ५० रनमा अविजित रहे । महमूदुल्लाह यो टेस्ट करिअरको पाँचौं र सर्वोत्कृष्ट प्रदर्शन हो । यसअघि टेस्टमा महमूदुल्लाह उत्कृष्ट प्रदर्शन २०१९ मा न्युजिल्यान्डविरुद्ध १ सय ४६ रन थियो । तस्किन अहमद १ सय ३४ बलमा ११ चौका सहित ७५ रनमा आउट भए ।

नवौं विकेटका लागि महमूदुल्लाह र तस्किनले १ सय ९१ रनको सर्वोत्कृष्ट शतकीय साझेदारी गरेपछि बंगलादेशले विशाल योगफल बनाएको थियो । नवौं विकेटका लागि भएको यो टेस्ट इतिहासकै दोस्रो ठूलो साझेदारी हो । यसअघि नवौं विकेटका लागि दक्षिण अफ्रिका मार्क बाउचर र प्याट सिमकोक्सले सन् १९९८ मा पाकिस्तानविरुद्ध १ सय ९५ रनको साझेदारी गरेका थिए ।

पहिलो दिन लिटन दास १ सय ४७ बलमा १३ चौका सहित ९५ रनमा क्याच आउट भएका थिए । दास आफ्नो टेस्ट करिअरको पहिलो शतक बनाउन पाँच रनले चुकेका थिए । तीव्र गतिका बलर डोनाल्ड तिरिपानोको ७९ औं ओभरको पहिलो बलमा फाइन लेगमा भिक्टर न्याउचीले डाइभ हान्दै उत्कृष्ट क्याच लिएपछि शतकको सपना अधुरै बनेको थियो ।

कप्तान मोमिनुल हक ९२ बलमा १३ चौका सहित ७० रनमा क्याच आउट भए । शद्मान ईस्लाम २३, मुश्फिकुर रहिम ११ र सकिब अल हसन तीन रनमा आउट भए । एक सयम १३२–६ को कमजोर अवस्थामा पुगेको बंगलादेशलाई सातौं विकेटका लागि लिटन दास र महमुदूल्लाह रियादले १ सय ३८ रनको उत्कृष्ट शतकीय साझेदारी गरेका थिए । जिम्बावेका तीव्र गतिका युवा बलर ब्लेसिङ मुर्जाबानीले सर्वाधिक चार विकेट लिए। डोनाल्ड तिरिपानो र भिक्टर न्याउचीले दुई दुई विकेट लिए ।

घरेलु टोली जिम्बावेले पहिलो इनिङमा ४१ ओभरमा १ विकेट गुमाउँदै १ सय १४ रन बनाएको छ । जिम्बावे ३ सय ५४ रनले पछि छ । जिम्बावेका कप्तान ब्रेन्डन टेलर ४६ बलमा ६ चौका सहित ३७ रनमा अविजित छन् । ताकुड्जवानाशे कैतानो १ सय १७ बलमा ४ चौका सहित ३३ रनमा अविजित छन् । ओपनर मिल्टन शुम्बा ८३ बलमा ७ चौका सहित सकिब अल हसनको बलमा ४१ रनमा एलबिडब्लू आउट भए ।