एजेन्सी – आक्रमक ब्याट्सम्यान आन्द्रे रसेलले आक्रामक ब्याटिङका साथ आफ्नो करिअरकै सर्वोत्कृष्ट प्रदर्शन गरेपछि वेस्ट इन्डिजले पहिलो टि२० आई खेलमा अष्ट्रेलियालाई १ सय ४६ रनको लक्ष्य दिएको छ ।

ड्यारेन स्यामी नेशनल क्रिकेट स्टेडियममा टस हारेर ब्याटिङ थालेको वेस्ट इन्डिजले निर्धारित २० ओभरमा ६ विकेटको क्षतिमा १ सय ४५ रन बनायो । वेस्ट इन्डिजका आन्द्रे रसेल २८ बलमा ३ चौका र ५ छक्का सहित सर्वाधिक ५१ रनको योगदान दिए । रसेलले २६ बलमा आफ्नो टि२० आई करिअरको पहिलो अर्धशतक पूरा गरेका थिए । रसेलले १९ औं ओभरको चौथो बलमा तीव्र गतिका बलर मिचेल स्टार्कलाई छक्का प्रहार गर्दै टि२० आई करिअरको पहिलो अर्धशतक पूरा गरेका थिए । यसअघि टि२० आईमा रसेलको उत्कृष्ट प्रदर्शन २०१८ मा बंगलादेशविरुद्ध ४७ रन थियो ।

वेस्ट इन्डिजको सुरुवात कमजोर र खराब रह्यो । तीव्र गतिका बलर जोश हेजलवुडको दोस्रो ओभरको दोस्रो बलमा मिचेल मार्शबाट ओपनर ईभिन लुईस शून्यमा क्याच आउट भएका थिए । हेजलवुडकै छैटौं ओभरको पाँचौं बलमा क्रिस गेल टप एज लागेर प्वाइन्टमा एश्टन अगरबाट चार रनमा क्याच हुन पुगे । मिचेल मार्शको आठौं ओभरको तेस्रो बलमा ओपनर लेन्डल सिमन्स कट बिहाइन्ड हुँदै २७ रनमा विकेटकिपर म्याथ्यु वेडबाट समातिएका थिए । सिमन्सले २८ बलमा समान दुई चौका र छक्का प्रहार गरे ।

कप्तान निकोलस पुरनलाई जोश फिलिपेले १२ औं ओभरको पाँचौं बलमा १७ रनमा उत्कृष्ट रन आउट गराए । पुरनले १६ बलमा तीन चौका प्रहार गरे । नियमित कप्तान काइरन पोलार्ड चोटका कारण टोलीमा छैनन् । शिम्रन हेटमायर २५ बलमा एक चौका सहित २० रनमा क्याच आउट भए । फबिएन एलेन ८ र ड्वेन ब्राभो ७ रनमा अविजित रहे । रसेल अन्तिम ओभरमा हेजलवुडको बलमा बोल्ड आउट भएका थिए ।

अष्ट्रेलिया तीव्र गतिका बलर जोश हेजलवुडले ४ ओभरमा एक मेडन सहित मात्र १२ रन खर्चेर प्रमुख तीन विकेट लिँदै घातक बलिङ गरे । मध्य गतिका बलर मिचेल मार्शले ४ ओभरमा २६ रन खर्चेर २ विकेट लिए ।