एजेन्सी– बंगलादेशविरुद्ध एक मात्र टेस्ट खेलमा जितको लागि विशाल विजयी लक्ष्य पछ्याएको घरेलु टोली जिम्बावे चौथो दिनको समाप्तिमा मध्यम ब्याटिङ गरेको छ । जितको लागि ४ सय ७७ रनको लक्ष्य पाएको जिम्बावे पाँचौं तथा अन्तिम दिन ४० ओभरमा १४०–३ को अवस्थाबाट इनिङ सुरु गर्ने छ ।

डियोन मायर्स १८ र डोनाल्ड तिरिपानो ७ रनमा अविजित छन् । कप्तान बेन्डन टेलर ७३ बलमा १६ चौका सहित ९२ रनमा कट एण्ड बोल्ड आउट भए । टेलरलाई स्पिनर मेहेदी हसनले चौथो दिन खेलको अन्त्य तिर आउट गरेका थिए । ओपनर ताकुद्जवानाशे कैटानो १ सय २ बल खेल्दै एक चौका सहित ७ रनमा एलबिडब्लू आउट भए । कैटानोलाई सकिबले एलिबडब्लू आउट गरेका थिए । ओपनर मिल्टन शुम्बा ११ रनमा क्याच आउट भए ।

त्यसअघि बंगलादेशले दोस्रो इनिङमा ६७.४ ओभरमा २ सय ८४ रनमा एक विकेट गुमाउँदै इनिङ समाप्तिको घोषणा गरेको थियो । पहिलो इनिङमा १ सय ९२ रनको अग्रता लिएको बंगलादेशले समग्रमा ४ सय ७६ रन बनाएको थियो । बंगलादेशका ओपनर शद्मान ईस्लाम १ सय ९६ बलमा ९ चौका सहित १ सय १५ रनमा अविजित रहे । नाज्मुल हसन शान्टो १ सय १८ बलमा ५ चौका र ६ छक्का सहित १ सय १७ रनमा अविजित रहे । दोस्रो विकेटका लागि नाज्मुल र शद्मान १ सय ९६ रनको अविजित शतकीय साझेदारी गरेका थिए । सैफ हसन ४३ रनमा आउट भए ।

त्यसअघि जिम्बावे पहिलो इनिङमा २ सय ७६ रनमा अल आउट भयो । जिम्बावे पहिलो इनिङमा १ सय ९२ रनले पछि परेको थियो । जिम्बावेका ओपनर ताकुड्जवानाशे कैतानोले ३ सय ११ बलमा ९ चौका सहित सर्वाधिक ८७ रनको योगदान दिए । कप्तान ब्रेन्डन टेलरले ९२ बलमा १२ चौका र १ छक्का सहित ८१ रनको योगदान दिए । टेलर र कैतानोले १ सय १५ रनको शतकीय साझेदारी गर्दै जिम्बावेलाई राम्रो सुरुवात दिलाएका थिए ।

एक समय २२५–३ को अवस्थामा रहेको जिम्बावेले थप ५१ रन जोड्न ७ विकेट गुमाएपछि सस्तैमा अल आउट भएको थियो । ओपनर मिल्टन शुम्बा ४१, डियोन मेयर्स २७ र विकेटकिपर रेगिस चकब्वा ३१ रन बनाए । अन्यले दोहोरो अंकमा रन बनाउन सकेनन् । बंगलादेशका स्पिनर मेहेदी हसनले पाँच र सकिब अल हसनले चार विकेट लिए । तस्किन अहमदको नाममा एक विकेट रह्यो ।

त्यसअघि पहिलो इनिङमा हरारे स्पोर्ट्स क्लबमा टस जितेर ब्याटिङ रोजेको बंगलादेश दोस्रो दिन १ सय २६ ओभरमा ४ सय ६८ रनमा अल आउट भएको थियो । महमूदुल्लाह २ सय ७८ बलमा १७ चौका र १ छक्का सहित १ सय ५० रनमा अविजित रहे । महमूदुल्लाह यो टेस्ट करिअरको पाँचौं र सर्वोत्कृष्ट प्रदर्शन हो । यसअघि टेस्टमा महमूदुल्लाह उत्कृष्ट प्रदर्शन २०१९ मा न्युजिल्यान्डविरुद्ध १ सय ४६ रन थियो । तस्किन अहमद १ सय ३४ बलमा ११ चौका सहित ७५ रनमा आउट भए ।

नवौं विकेटका लागि महमूदुल्लाह र तस्किनले १ सय ९१ रनको सर्वोत्कृष्ट शतकीय साझेदारी गरेपछि बंगलादेशले विशाल योगफल बनाएको थियो । नवौं विकेटका लागि भएको यो टेस्ट इतिहासकै दोस्रो ठूलो साझेदारी हो । यसअघि नवौं विकेटका लागि दक्षिण अफ्रिका मार्क बाउचर र प्याट सिमकोक्सले सन् १९९८ मा पाकिस्तानविरुद्ध १ सय ९५ रनको साझेदारी गरेका थिए ।

पहिलो दिन लिटन दास १ सय ४७ बलमा १३ चौका सहित ९५ रनमा क्याच आउट भएका थिए । दास आफ्नो टेस्ट करिअरको पहिलो शतक बनाउन पाँच रनले चुकेका थिए । तीव्र गतिका बलर डोनाल्ड तिरिपानोको ७९ औं ओभरको पहिलो बलमा फाइन लेगमा भिक्टर न्याउचीले डाइभ हान्दै उत्कृष्ट क्याच लिएपछि शतकको सपना अधुरै बनेको थियो ।

कप्तान मोमिनुल हक ९२ बलमा १३ चौका सहित ७० रनमा क्याच आउट भए । शद्मान ईस्लाम २३, मुश्फिकुर रहिम ११ र सकिब अल हसन तीन रनमा आउट भए । एक सयम १३२–६ को कमजोर अवस्थामा पुगेको बंगलादेशलाई सातौं विकेटका लागि लिटन दास र महमुदूल्लाह रियादले १ सय ३८ रनको उत्कृष्ट शतकीय साझेदारी गरेका थिए । जिम्बावेका तीव्र गतिका युवा बलर ब्लेसिङ मर्जाबानीले सर्वाधिक चार विकेट लिए। डोनाल्ड तिरिपानो र भिक्टर न्याउचीले दुई दुई विकेट लिए ।