एजेन्सी – अष्ट्रेलिया दोस्रो टि२० आई खेलमा घरेलु टोली वेस्ट इन्डिज ५६ रनले विजयी भएको छ । लगातार दोस्रो जितसँगै पाँच टि२० आई खेलको सिरिजमा वेस्ट इन्डिजले २–० को अग्रता लिएको छ ।

जितको लागि १ सय ९७ रनको विजयी लक्ष्य पछ्याएको अष्ट्रेलिया १९२ ओभरमा १ सय ४० रनमा अल आउट भयो । अष्ट्रेलिया मिचेल मार्शले ४२ बलमा ५ चौका र १ छक्का सहित सर्वाधिक ५४ रनको योगदान दिए । जोश फिलिपे १३ र मोइजेस हेनरिक्सले १९ रनमा आउट भए । अष्ट्रेलिया ८ खेलाडीले दोहोरो अंकमा रन बनाउन सकेनन् । ओपनर म्याथ्यु वेड शून्य, आरोन फिन्च ६, बेन म्याकडेरमोट ७, ड्यानियल क्रिष्टियन ९ र एश्टन अगर १ रनमा आउट भए ।

वेस्ट इन्डिजका लेग स्पिनर हेडेन वाल्श जुनियरले ४ ओभरमा २९ रन खर्चेर ३ विकेट लिए । शेल्डन कटरेल ३ ओभरमा २२ रन खर्चेर २ विकेट लिए । फिडेल एडवार्ड्स, आन्द्रे रसेल, ड्वेन ब्राभो र क्रिस गेलले एक एक विकेट लिए ।

त्यसअघि सेन्ट लुसियामा टस हारेर ब्याटिङ थालेको घरेलु टोली वेस्ट इन्डिजले निर्धारित २० ओभरमा ४ विकेट गुमाउँदै १ सय ९६ रन बनाएको थियो । वेस्ट इन्डिजका शिम्रन हेटमायरले ३६ बलमा २ चौका र ४ छक्का सहित ६१ रनको योगदान दिए । ब्राभो ३४ बलमा १ चौका र ३ छक्का सहित ४७ रनमा अविजित रहे । आन्द्रे रसेल ८ बलमा २ चौका र २ छक्का सहित २४ रन जोड्दै उत्कृष्ट अन्त्य गरे ।

तेस्रो ओभरको चौथो बलमा स्पिनर एश्टन अगरले ओपनर आन्द्रे फ्लेचरलाई ९ रनमा बोल्ड आउट गरेका थिए । छैटौं ओभरको तेस्रो बलमा ओपनर लेन्डन सिमन्स ३१ रनमा क्याच आउट भए । सिमन्सलाई जोश हेजलवुडले विकेटकिपर म्याथ्यु वेडबाट क्याच गराएका थिए । उनले २१ बलमा १ चौका र ३ छक्का प्रहार गरे ।

क्रिस गेललाई मिचेल मार्शले १३ रनमा बोल्ड आउट गरे। तर चौथो विकेटका लागि हेटमायर र ब्राभोले १ सय ३ रनको उत्कृष्ट शतकीय साझेदारी गर्दै बलियो योगफलमा पुर्याएका थिए । हेटमायर रन आउट भएका थिए । अष्ट्रेलिया जोश हेजलवुड, एश्टन अगर र मिचेल मार्शले एक एक विकेट लिए । पहिलो खेलमा वेस्ट इन्डिज १८ रनले विजयी भएको थियो । तेस्रो खेल मंगलबार बिहान हुने छ ।