एजेन्सी – अनुभवी ब्याट्सम्यान क्रिस गेलको सानदार ब्याटिङको सहयोगमा वेस्ट इन्डिजले अष्ट्रेलियाविरुद्ध पाँच टि२० आई सिरिज दुई खेल अगावै जितेको छ । मंगलबार बिहान तेस्रो खेलमा अष्ट्रेलियालाई सहजै ६ विकेटले हराउँदै वेस्ट इन्डिजले टि२० आई सिरिज उपाधि जितेको हो ।

जितको लागि १ सय ४२ रनको विजयी लक्ष्य पछ्याएको वेस्ट इन्डिजले १४.५ ओभरमा ४ विकेट गुमाउँदै पूरा गर्यो । वेस्ट इन्डिजका क्रिस गेलले ३८ बलमा ४ चौका र ७ छक्का सहित ६७ रनको उत्कृष्ट इनिङ खेले । गेलले ३३ बलमा अर्धशतक पूरा गरेका थिए । गेलले स्पिनर एडम जाम्पालाई ११ औं ओभरमा लगातार तीन छक्का प्रहार गर्दै २०१६ पछि २० आई क्रिकेटमा पहिलो अर्धशतक पूरा गरेका थिए ।

योसँगै गेलको टि२० क्रिकेटमा १४ हजार रन पनि पूरा भएको छ । उनी ११ हजार भन्दा बढी रन बनाउने टि२० क्रिकेटका एक्लो खेलाडी हुन् । गेल १२ औं ओभरको अन्तिम बलमा तीव्र गतिका बलर राइली मेरिडिथलाई लगातार तेस्रो छक्का प्रहार गर्ने धुनमा विकेटकिपर म्याथ्यु वेडबाट क्याच आउट हुन पुगेका थिए । मेरिडिथले चलाखीपूर्ण स्वोलोवर बलगरेपछि गेल आउट भएका थिए ।

कप्तान निकोलस पुरन २७ बलमा ४ चौका र १ छक्का सहित ३२ रनमा अविजित रहे । पुरन र गेलले तेस्रो विकेटका लागि ६७ रनको साझेदारी गरेका थिए । आन्द्रे रसेल ७ रनमा अविजित रहे । ओपनर आन्द्रे फ्लेचर ४, लेन्डन सिमन्स १३ र ड्वेन ब्राभो ७ रनमा आउट भए । अष्ट्रेलिया राइली मेरिडिथले ३.५ ओभरमा ४८ रन खर्चेर ३ विकेट लिए । मिचेल स्टार्कको नाममा १ विकेट रह्यो ।

त्यसअघि ड्यारेन स्यामी नेशनल क्रिकेट स्टेडियममा टस जितेर ब्याटिङ थालेको अष्ट्रेलियाले निर्धारित २० ओभरमा ६ विकेट गुमाउँदै १ सय ४१ रन बनाएको थियो । अष्ट्रेलिया मोइजेस हेनरिक्सले २९ बलमा २ छक्का सहित सर्वाधिक ३३ रनको योगदान दिए । एश्टन टर्नर २२ बलमा २ चौका सहित २४ रनमा रन आउट भए । टर्नरलाई अष्ट्रेलियाले एश्टन अगरको स्थानमा मौका दिएको थियो । पाँचौं विकेटका लागि टर्नर र हेनरिक्सले सर्वाधिक ५९ रनको साझेदारी गरेका थिए ।

अष्ट्रेलियालाई ओपनर म्याथ्यु वेड र कप्तान आरोन फिन्चले पहिलो विकेटका लागि पाँच ओभरमा ४१ रनको साझेदारी गरेका थिए । तीव्र गतिका बलर ओबेद म्याककोयले वेडलाई २३ रनमा बोल्ड गर्दै पहिलो सफलता दिलाए । वेडले १६ बलमा ४ चौका प्रहार गरे । नवौं ओभरको तेस्रो बलमा फबिएन एलेनले मिचेल मार्शलाई ९ रनमा एलबिडब्लू आउट गरे । मार्शले यसअघि दुबै खेलमा अर्धशतक प्रहार गरेका थिए । जोश फिलिपेको स्थानमा खेलेका एलेक्स केरी १३ रनमा क्याच आउट भए ।

स्पिनर हेडेन वाल्श जुनियरको बलमा १२ औं ओभरको पहिलो बलमा केरी लेन्डन सिमन्सबाट समातिनु अघि ९ बलमा २ चौका प्रहार गरे । चार बलपछि ठूलो सट खेलेका फिन्च फबिएन एलेबाट ३० रनमा क्याच आउट भए । डिप मिडविकेटमा ब्राभोबाट छुटेको बललाई एलेनले उत्कृष्ट प्रयासका साथ क्याच लिँदै फिन्चलाई पेभिलिएन फर्काएका थिए । फिन्चले ३१ बलमा २ चौका प्रहार गरे ।

वेस्ट इन्डिजका हेडेन वाल्श जुनियरले ४ ओभरमा १८ रन खर्चेर २ विकेट लिए । ड्वेन ब्राभो, फबिएन एलेन र ओबेद म्याककोयले एक एक विकेट लिए । पहिलो खेलमा वेस्ट इन्डिज १८ रन र दोस्रो खेला ५६ रनले विजयी भएको थियो । चौथो खेल बिहिबार बिहान हुने छ ।