एजेन्सी – पाकिस्तान क्रिकेट टोलीका कप्तान बाबर आजमले ओडिआई क्रिकेटमा दुर्लभ कीर्तिमान बनाएका छन् । इंग्ल्यान्डविरुद्ध तेस्रो तथा अन्तिम ओडिआई खेलमा बाबरले आफ्नो करिअकै उत्कृष्ट प्रदर्शन गर्ने क्रममा उक्त दुर्लभ कीर्तिमान बनाएका हुन् ।

बाबरले इंग्ल्यान्डविरुद्ध मंगलबार राती १ सय ३९ बलमा १४ चौका र ४ छक्का सहित १ सय ५८ रनको सर्वोत्कृष्ट शतकीय इनिङ खेलेका थिए । बाबरको यो ओडिआई करिअरको १४ औं शतक हो । बाबर ओडिआई क्रिकेट इतिहासकै सर्वाधिक छिटो इनिङमा १४ औं शतक प्रहार गर्ने ब्याट्सम्यान बनेका छन् ।

बाबरले यो सफलता ८१ औं इनिङमा पूरा गरेका हुन् । अष्ट्रेलिया महिला क्रिकेट टोलीकी कप्तान मेग ल्यानिंगले ८२ औं इनिङमा उक्त सफलता हात पारेकी थिइन् । पुरुष ओडिआईमा बाबर अघि दक्षिण अफ्रिका पूर्व ओपनर हाशिम आमलाले ८४ औं इनिङमा १४ औं शतक पूरा गर्दै कीर्तिमान राख्दै आएका थिए । आमलापछि अष्ट्रेलिया ओपनर डेविड वार्नरले ९८ औं र भारतीय क्रिकेट टोलीका कप्तान विराट कोहलीले १ सय ३ औं इनिङमा उक्त सफलता हात पारेका थिए ।

त्यस्तै बाबर इंग्ल्यान्डविरुद्ध १ सय ५० भन्दामाथि रन बनाउने पहिलो ब्याट्सम्यान बनेका छन् । बाबर अघि इंग्ल्यान्डविरुद्ध विपक्ष्य कप्तानले बनाएको कीर्तिमान दक्षिण अफ्रिका पूर्व ब्याट्सम्यान ग्रिम स्मिथको नाममा थियो । सन् २००९ मा स्मिथले इंग्ल्यान्डविरुद्ध १ सय ४१ रन बनाएका थिए । इंग्ल्यान्डविरुद्ध पाकिस्तानका ब्याट्सम्यानले बनाएको यो उच्च स्कोर हो । यसअघि २०१९ मा ओपनर ईमाम उल हकले १ सय ५१ रनको शतकीय इनिङ खेलेका थिए । बाबर पाकिस्तानबाट ओडिआईमा कप्तानको रुपमा एकै खेलमा सर्वाधिक धेरै रन बनाउने खेलाडी पनि बनेका छन् । बाबरअघि सन् २००९ मा शोएब मलिकले भारतविरुद्ध कप्तानी गर्दै १ सय २५ रन अविजित थियो ।

बाबरको यो ओडिआई करिअरको उत्कृष्ट प्रदर्शन हो । यसअघि बाबरको सन् २०१७ मा वेस्ट इन्डिजविरुद्ध १ सय २५ रन अविजित ओडिआई करिअरको उच्च रहँदै आएको थियो । बाबरको अन्तर्राष्ट्रिय करिअरको पनि सर्वोत्कृष्ट प्रदर्शन पर्दछ । बाबरको टि२० आईमा १ सय २२ र टेस्टमा १ सय ४३ रन उच्च प्रदर्शनको रुपमा छ ।

बाबरले १ सय ४ बलमा शतक ओडिआई करिअरको १४ औं शतक पूरा गरेका थिए । बाबरको सानदार शतक र मोहम्मद रिजवानको आक्रामक ७४ रनको सहयोगमा बर्मिंघममा टस हारेर ब्याटिङको निम्तो पाएको पाकिस्तानले निर्धारित ५० ओभरमा ९ विकेट गुमाउँदै ३ सय ३१ रन बनाएको थियो । तर बलर नच्लदा पाकिस्तान ३ विकेटले पराजित हुन पुग्यो । उक्त लक्ष्य इंग्ल्यान्डले ४८ ओभरमा ७ विकेटको क्षतिमा पूरा गर्यो । इंग्ल्यान्डका जेम्श भिन्सले १ सय २ र लुईस ग्रेगरीले ७७ रनको इनिङ खेल्दै जित दिलाए ।

इंग्ल्यान्डले पाकिस्तानविरुद्ध तीन ओडिआई खेलको सिरिजमा सानदार क्लिनस्विप गरेको छ । पहिलो खेलमा पाकिस्तान १८ रन र दोस्रो खेलमा ५२ रनले पराजित भएको थियो । स्टोक्सले ओडिआईमा पहिलो पटक कप्तानी गर्दै सानदार नतिजा दिलाएका हुन् । ओईन मोर्गनको कप्तानीमा घोषणा टोलीका तीन सदस्य खेलाडीमा कोरोना देखिएपछि इंग्ल्यान्डले बेन स्टोक्सको नेतृत्वमा नयाँ टोली घोषणा गरेको थियो । पाकिस्तान र इंग्ल्यान्डबीच थप तीन टि२० आईको सिरिज हुने छ । पहिलो खेल शुक्रबार हुने छ ।