एजेन्सी – अलराउन्डर मिचेल मार्शको बल र ब्याटिङ दुबैमा सानदार प्रदर्शन र तीव्र गतिका बलर मिचेल स्टार्क अन्तिम ओभरमा नायक बन्दा अष्ट्रेलियाले वेस्ट इन्डिजमाथि रोमाञ्चक जित हात पारेको छ ।

पाँच टि२० आई सिरिज अन्तर्गत चौथो टि२० आई खेलमा अष्ट्रेलियाले वेस्ट इन्डिजलाई चार रनले पराजित गरेको छ । वेस्ट इन्डिजलाई जितको लागि अन्तिम १२ बलमा ३६ रन चाहिँएको थियो । १९ औं ओभरमा राइली मेरिडिथले चार छक्का सहित २५ रन खर्चेपछि अष्ट्रेलिया हार नजिक पुगेको थियो । फेबिएन एलेनले तीन र रसेलले एक छक्का प्रहार गरेका थिए ।

अन्तिम ६ बलमा वेस्ट इन्डिजलाई ११ रन चाहिँएको थियो । मिचेल स्टार्कले विष्फोटक ब्याट्सम्यान आन्द्रे रसेललाई मात्र ६ रन खर्चिएपछि अष्ट्रेलियाले रोमाञ्चक जित हात पारेको हो । सुरुवाती चार योर्करका साथ बल आन्द्रे रसेललाई डट राखेपछि अष्ट्रेलिया जित नजिक पुगेको थियो । पाँचौं बलमा पनि रसेलले कुनै रन जोडेनन् । अन्तिम बलमा रसेलले छक्का प्रहार गरेपनि जितको लागि पर्याप्त थिएन ।

जितको लागि १ सय ९० रनको विजयी लक्ष्य पछ्याएको वेस्ट इन्डिजले २० ओभरमा ६ विकेट गुमाउँदै १ सय ८५ रन बनायो । वेस्ट इन्डिजका ओपनर लेन्डन सिमन्सले ४८ बलमा १० चौका र २ छक्का सहित सर्वाधिक ७२ रनको योगदान दिए । वेस्ट इन्डिजलाई ओपनर ईभिन लुईस र सिमन्सले ४.५ ओभरमा ६२ रन जोड्दै उत्कृष्ट सुरुवात दिलाए । स्पिनर एडम जाम्पाले लुईसलाई ३१ बलमा बोल्ड गरे । लुईसले १४ बलमा ४ चौका र २ छक्का प्रहार गरे । मार्शको आठौं ओभरको दोस्रो बलमा ठूलो सट खेलेका क्रिस गेल लङअनमा जेशन बेहरनडोर्फबाट एक रनमा समातिन पुगेका थिए ।

११ औं ओभरको तेस्रो बलमा जाम्पाले युवा ब्याट्सम्यान आन्द्रे फ्लेचरलाई ६ रनमा बोल्ड आउट गरेका थिए । १६ औं ओभरमा मार्शले दुई महत्वपूर्ण विकेट लिदै अष्ट्रेलिया जित सहज बनाएका थिए । दोस्रो बलमा कप्तान निकोलस पुरन ड्यानियल क्रिष्टियनबाट लङअफमा १६ रनमा क्याच आउट गराए । पुरनले १५ बलमा समान एक चौका र छक्का प्रहार गरे ।

लगत्तै अर्को बलमा सिमन्स ठूलो सट खेल्नेक्रममा डिपमिड विकेटमा मोइजेस हेनरिसक्सले उत्कृष्ट क्याच लिएपछि वेस्ट इन्डिज दबाबमा परेको थियो । फेबिएन १४ बलमा २ चौका र ३ छक्का सहित २९ रन जोडे । आन्द्रे रसेल १३ बलमा ३ छक्का सहित २४ रनमा अविजित रहे ।

अष्ट्रेलिया मिचेल मार्शले ४ ओभरमा २४ रन खर्चर ३ विकेट लिए । एडम जाम्पाले ४ ओभरमा २० रन खर्चेर २ विकेट लिए । राइलि मेरिडिथको नाममा एक विकेट रह्यो ।

त्यसअघि ड्यारेन स्यामी नेशनल क्रिकेट स्टेडियम सेन्ट लुसियामा टस जितेर पहिला ब्याटिङ रोजेको अष्ट्रेलियाले निर्धारित २० ओभरमा ६ विकेट गुमाउँदै १ सय ८९ रन बनाएको थियो । अष्ट्रेलिया मिचेल मार्शले ४५ बलमा ४ चौका र ६ छक्का सहित सर्वाधिक ७५ रनको योगदान दिए । मार्शको जारी सिरिजको यो तेस्रो अर्धशतक हो । कप्तान आरोन फिन्चले ३७ बलमा ५ चौका र ३ छक्का सहित ५३ रनको योगदान दिए । अन्य ब्याट्सम्यानले भने राम्रो प्रर्दशन गर्न नसक्दा विशाल योगफल बनाउन चुकेको हो ।

तीव्र गतिका बलर ओशन थोमसले दोस्रो ओभरको पाँचौं बलमा ओपनर म्याथ्यु वेडलाई ५ रनमा विकेटकिपर तथा कप्तान निकोलस पुरनबाट क्याच गराउँदै पहिलो सफलता दिलाएका थिए । दोस्रो विकेटका लागि फिन्च र मार्शले ६० बलमा १ सय १४ रनको उत्कृष्ट शतकीय साझेदारी गर्दै विशाल योगफलको सम्भावना देखाएपनि मध्यक्रम र तल्लोक्रमका ब्याट्सम्यान चल्न नसक्दा पूरा हुन सकेन ।

फिन्चलाई १२ औं ओभरको तेस्रो बलमा स्पिनर हेडेन वाल्श जुनियरले बोल्ड गर्दै वेस्ट इन्डिज खेलमा राम्रो पूनरागमन गराएका थिए । मध्यक्रम र फिनिसर कमजोर समस्या चौथो खेलमा पनि अष्ट्रेलियालाई निराश बनायो । फिन्च आउट हुँदा अष्ट्रेलिया ११।३ ओभरमा १२६–२ को बलियो अवस्थामा थियो । फिन्च आउट भएको अको बलमा एलेक्स केरी कट एण्ड बोल्ड आउट भए ।

लगत्तै अर्को ओभरको चौथो बलमा मोइजेस हेनरिक्स ठूलो सट खेल्नेक्रममा लङअनमा फबिएन एलेनबाट समातिन पुगे । एश्टन टर्नर १० बल खेल्दै ६ रनमा स्टम्पिङ आउट हुन पुगे । ड्यानियल क्रिष्टियन १४ बलमा २ चौका र १ छक्का सहित २२ रनमा अविजित रहे । मिचेल स्टार्क ८ रनमा अविजित रहे ।

वेस्ट इन्डिजका हेडेन वाल्श जुनियरले ४ ओभरमा २७ रन खर्चेर ३ विकेट लिए । आन्द्रे रसेल, फबिएन एलेन र ओशान थोमसले एक एक विकेट लिए । वेस्ट इन्डिज पहिलो खेलमा १८ रन, दोस्रो खेलमा ५६ रन र तेस्रो खेलम ६ विकेटले विजयी हुँदै सिरिज दुई खेल अगावै जितेको थियो । अन्तिम खेल शुक्रबार हुने छ ।