एजेन्सी– भारतीय क्रिकेट टोलीका पूर्व स्टार अलराउन्डर मोहम्मद कैफले विराट कोहलीको कप्तानीमा स्पष्टता नभएको बताएका छन् । भारतीय टोलीको बारे चर्चा गर्दै कैफले कोहलीको कप्तानीमा स्पष्टता नभएको बताएका हुन् । भारतले आइतबार देखि श्रीलंकासँग तीन ओडिआई र तीन टि२० आई सिरिज खेल्दै छ ।

‘भारतीय टोली र कोहलीको कप्तानीमा स्पष्टता छैन । कोहलीले कप्तानीमा आइसिसीको ट्रफी जित्न सकेका छैनन् । आज जुन खेलाडी लयमा छ त्यहिँले मौका पाउँछ । विगतको प्रदर्शन हेरिदैन’, कैफले भने ।

त्यसैमा उनले थपे, ‘त्यसैको कारण युवा खेलाडीले मौका पाउने र ड्रप हुने क्रम बढी छ । भारतीय टोलीमा खेलाडीको स्थान पक्का छैन । यो खेलाडीलाई पनि थाहा छ । लगातार परिवर्तनले खेलाडीमा डर पैदा हुन्छ । सुरक्षित महसुस गर्दैनन् ।’

‘मैले धेरै युवा खेलाडीको साथ कप्तानी पनि गरेको छु । भारतीय टोलीमा खेलाडीले सुरक्षित महसुस गर्न सकेका छैनन् । खेलाडीले मौका पाएन भने आफ्नो उत्कृष्ट प्रदर्शन गर्न पाउँदैन । स्टार खेलाडी बन्न लगातार मौका पाउनुपर्छ’, उनले भने ।

कोहलीको कप्तानीमा स्पष्टता नहुँदा दबाबमा भारतले कमजोर प्रदर्शन गर्ने उनी बताउँछन् । ‘एकदिवसिय विश्वकपमा चार नम्बरको ब्याटिङ समस्या दुई वर्ष भन्दा बढी प्रयोग हुँदा पनि समाधान हुन सकेन । इंग्ल्यान्डमा टेस्ट च्याम्पियनसिपमा तीव्र गतिका अलराउन्डर खेलाडी नहुँदा पराजित हुन पर्यो । कोहली खेलाडी बनाउन तर्फ लाग्दैनन् । खराब प्रदर्शन गरे ड्रप गर्दिन्छन् । सौरभ गांगुली खराब प्रदर्शन गरेपनि कति खेल मौका दिने स्पष्ट बताउथें’, कैफले भने ।

विश्वकपमा भारतको कुन टोली जान्छ भन्ने अहिले कप्तान विराट पनि भन्न नसक्ने बताउँछन् । श्रीलंका र आइपिएल प्रदर्शनले धेरै निर्धारण गर्ने उनको बुझाइ छ । कैफले श्रीलंका भ्रमणमा हार्दिक पान्ड्या प्रदर्शन निकै महत्वपूर्ण हुने बताए ।

हार्दिकले बलिङ गरेको खण्डमा भारतीय तीनै शैलीमा पहिलो रोजाईमा खेल्न सक्ने उनले बताए । हार्दिकसँगै भुवनेश्वर कुमार, शिखर धवन र सूर्यकुमार यादवलाई टि२० टोलीमा स्थान बनाउन श्रीलंका भ्रमणमा उच्च प्रदर्शन गर्नुपर्ने बताए ।