एजेन्सी – पाकिस्तान र इंग्ल्यान्डबीचको पहिलो टि२० आई खेल आज राती हुँदै छ । खेल नेपाली समय अनुसार आज राती (शुक्रबार) ११ :५ मा सुरु हुने छ ।

तीन ओडिआई सिरिजमा क्लिनस्विप बेहोरेको पाकिस्तान टि२० सिरिजमा बदला लिन चाहन्छ । दोस्रो रोजाईको टोलीले ओडिआई सिरिजमा क्लिनस्विप गरेको हुँदा प्रमुख खेलाडी सम्मिलित इंग्ल्यान्डको टोलीलाई टि२० मा त्यस्तै नतिजा दबाब छ । पाकिस्तानको बाबर आजम र इंग्ल्यान्डको ओईन मोर्गनको कप्तानीमा मैदान उत्रने छन् ।

ब्याट्सम्यान मोहम्मद हफिज, स्पिन अलराउन्डर ईमाद वासिम र लेग स्पिनर उस्मान कादिर टि२० टोलीमा हुने हुँदा पाकिस्तान मजबुत हुने अनुमान गरिएको छ । ओडिआई खेलमा पाकिस्तानको ब्याटिङ कमजोर रह्यो । तर पाकिस्तान टि२० शैलीमा लगातार उत्कृष्ट प्रदर्शन गर्दै आएको छ । पाकिस्तान ओडिआई सिरिजको हारको बदला टि२० मा लिने सोचमा छ ।

बाबरले अन्तिम खेलमा १ सय ५८ रनको सानदार शतकीय इनिङ खेल्दै आफू राम्रो लयमानै संकेत दिएका छन् । बाबर प्रमुख हतियार हुन् । उनी चलेको खण्डमा रोक्न मुश्किल पर्ने गर्दछ । बाबरले आडिआई सिरिजको गल्तिबाट पाठ सिक्दै टि२० मा राम्रो गर्ने बताई सकेका छन् ।

रिजवानले पनि अन्तिम खेलमा उत्कृष्ट ब्याटिङ गरेका थिए । पाकिस्तानको ओपनिङ बाबरसँगै शर्जिल खानले गर्ने सम्भावना छ । शर्जिलले घरेलु क्रिकेटमा सानदार प्रदर्शन गर्दै आएका छन् । ओपनर फखर जमानलाई बेन्चमा राख्न सक्छ । मध्यक्रममा रिजवान र हफिज हुने छ । यी दुबै ब्याट्सम्यानको प्रदर्शन निकै महत्वपूर्ण हुने छ ।

कप्तान बाबर ब्याटिङका प्रमुख खम्बा हुन् । पाकिस्तानले सहिब मकसूदलाई तल्लोक्रमको जिम्मा दिने छ । यस सिजनको पिएसएलका सर्वोत्कृष्ट खेलाडी सहिब ओडिआईमा भने चल्न सकेनन् । उनलाई टि२० मा प्रमाणित गर्न आवश्यक छ । तल्लोक्रममा शादब खान, ईमाद र हसन अली हुने छन् । स्पिनर उस्मान कादिरलाई मौका दिने उच्च सम्भावना छ । तीव्र गतिमा शाहिन अफ्रिदी, हसन र हरिस रौफ हुने छन् ।

यता इंग्ल्यान्डको ओपनिङ जस बटलर र जेसन रोयले गर्ने छन् । जोनी बेयरस्टो, डेविड मलान र मोर्गन मध्यक्रमका ब्याट्सम्यान हुन् । यी सबै खेलाडी ठूलो इनिङको क्षमता राख्छन् । युवा ब्याट्सम्यान टम ब्यान्टनलाई तल्लोक्रममा खेलाउन सक्छ । तर ब्यान्टनलाई खेलाउँदा स्पिनर आदिल राशिदलाई बेन्चमा राख्नुपर्ने हुन्छ । त्यसैले इंग्ल्यान्ड राशिदका साथ मैदान उत्रन पनि सक्छ ।

मोईन अली र लुईस ग्रेगरी अलराउन्डरको रुपमा खेल्ने सम्भावना छ । लुईसले ओडिआई सिरिजमा उत्कृष्ट प्रदर्शनका साथ टोलीमा स्थान बनाएका हुन् । तीव्र गतिका बलरमा टम करन, क्रिस जोर्डन र डेविड विल्लीको सम्भावना छ । प्रमुख खेलाडी सम्मिलित इंग्ल्यान्डको टोलीलाई उत्कृष्ट जितको दबाब छ ।

हेड टु हेड :

इंग्ल्यान्ड र पाकिस्तानबीच कुल १८ टि२० आई खेल भएको छ । पाकिस्तान ५ खेलमा विजयी हुँदा ११ खेलमा पराजित भएको छ । एक खेल बराबरी र एक नजिता विहिन छ । पछिल्ला पाँच खेल मध्य पाकिस्तान दुई खेलमा विजयी र दुई खेलमा पराजित भएको छ । एक खेल नजिता विहिन छ । अन्तिम टि२० खेल गत वर्ष सेप्टेम्बरमा पाकिस्तान ५ रनले विजयी भएको थियो । हफिजले उक्त खेलमा ८६ रनको उत्कृष्ट इनिङ खेलेका थिए ।