एजेन्सी – ओपनर लिटन दासको शतक र सकिब अल हसनको पाँच विकेटको सहयोगमा बंगलादेशले जिम्बावेमाथि १ सय ५५ रनको फराकिलो जित हात पारेको छ । योसँगै तीन ओडिआई खेलको सिरिजमा भ्रमण टोली बंगलादेशले १–० को अग्रता लिएको छ ।

जितको लागि २ सय ७७ रनको विजयी लक्ष्य पछ्याएको घरेलु टोली जिम्बावे २८.५ ओभरमा १ सय २१ रनमा अल आउट भयो । जिम्बावेका विकेटकिपर रेजिस चकबवाले ५१ बलमा ४ चौका र २ छक्का सहित सर्वाधिक ५४ रनको योगदान दिए । कप्तान ब्रेन्डन टेलर २४ र डियोन मायर्सले १८ रन बनाउन बाहेक अन्यले सम्झन योग्य प्रदर्शन गरेनन् । जिम्बावेका ७ खेलाडीले दोहोरो अंकमा रन बनाउन सकेनन् ।

बंगलादेशका स्पिनर सकिब अल हसनले ९.५ ओभरमा ३ मेडन सहित ३० रन खर्चेर ५ विकेट लिए । तस्किन अहमद, मोहम्मद सैफुद्दिन र शोरिफुल ईस्लामले एक एक विकेट लिए ।

त्यसअघि हरारे स्पोर्ट्स क्लबमा टस हारेर ब्याटिङ थालेको बंगलादेशले निर्धारित ५० ओभरमा ९ विकेट गुमाउँदै २ सय ७६ रन बनायो । लिटन दासले १ सय १४ बलमा ८ चौका सहित सर्वाधिक १ सय २ रनको योगदान दिए । अफिस हुसैनले ४५, महमुदूल्लाह ३३, मेहेदी हसनले २६, सकिब अल हसन र मोहम्मद मिथुनले १९–१९ विकेट लिए । जिम्बावेका ल्यूक जोंगवेले ९ ओभरमा ५१ रन खर्चेर ३ विकेट लिए । रिचर्ड नगारावा र ब्लेसिङ मुर्जाबानीले दुई दुई विकेट लिए । दोस्रो ओडिआई खेल आईतबार हुने छ ।

लिटन प्लेयर अफ द म्याच चुनिए । यो पाँच विकेटसँगै सकिब बंगलादेशबाट ओडिआईमा सर्वाधिक विकेट लिने बलर बनेका छन् । सकिबले २ सय १३ खेलमा २ सय ७४ विकेट लिएका छन् । पूर्व कप्तान मशर्फे मोर्तजाले २ सय १८ खेलमा २ सय ६९ विकेट लिएका छन् । सकिब टि२० आई र टेस्टमा पनि बंगलादेशबाट सर्वाधिक विकेट लिने बलर हुन् । सकिबले टि२० आईमा ९२ र टेस्टमा २ सय १५ विकेट लिएका छन् ।