एजेन्सी – आयरल्यान्डका स्पिन अलराउन्डर सिमि सिंहले दक्षिण अफ्रिकाविरुद्ध तेस्रो ओडिआई खेलमा विश्व कीर्तिमानी शतक प्रहार गरेका छन् । दक्षिण अफ्रिकाले आयरल्यान्डलाई तेस्रो तथा अन्तिम खेलमा ७० रनले पराजित गर्दै सिरिज १–१ को बराबरीमा सकाएको छ ।

जितको लागि ३ सय ४७ रनको विजयी लक्ष्य पछ्याएको आयरल्यान्ड ४७.१ ओभरमा २ सय ७६ रनमा अल आउट भयो । आयरल्यान्डका सिमि सिंह आठौं नम्बरमा ब्याटिङ गर्दै ९१ बलमा १४ चौका सहित एक सय रनमा अविजित रहे । सिमि ओडिआई इतिहासमा आठौं नम्बरमा ब्याटिङ गर्दै शतक प्रहार गर्ने पहिलो खेलाडी हुन् । यसअघि ओडिआईमा आठौं नम्बरमा ब्याटिङ गर्दै सर्वाधिक रन बनाउने कीर्तिमान इंग्ल्यान्डका क्रिस वोक्सको श्रीलंकाविरुद्ध र साम करनको भारतविरुद्ध थियो । करनको यसै वर्ष पुनेमा र वोक्सको २०१६ मा आठौं नम्बरमा ब्याटिङ गर्दै समान ९५ रनमा अविजित रहेका थिए । सिमिको यो अन्तर्राष्ट्रिय करिअरको पहिलो शतक हो । आयरल्यान्डको ४२ औं ओभरमा नवौं विकेटको पतन हुँदा सिमि ब्यक्तिगत ६८ रनमा अविजित थिए ।

त्यसपछि सिमिले उत्कृष्ट ब्याटिङका साथ शतक सम्म पुगेका हुन् । सिमिलाई शतक सम्म पुर्याउन क्रेग यौंग १४ बलमा ८ रन जोड्दै राम्रो साथ दिए । सिमिले क्रेगसँग अन्तिम विकेटका लागि ४७ रनको साझेदारी गरेका थिए ।

युवा अराउन्डर कर्टिस क्याम्फरले ५४ बलमा ५ चौका र १ छक्का सहित ५४ रनमा आउट भए । एक समय १९ ओभरमा ९२–६ को कमजोर अवस्थामा पुगेको आयरल्यान्डलाई सातौं विकेटका लागि सिमि र कर्टिसले १ सय ७ बलमा १ सय ४ रनको शतकीय साझेदारी गर्दै इनिङ उकासेका थिए । सिमिले ९२–६ को कठिन अवस्थाबाट शतक प्रहार गर्न सफल भएका हुन् । आयरल्यान्डका ओपनर पल स्टर्लिङ ११, कप्तान एन्ड्रयू बलबर्नी ७, ह्यारी टेक्टर २९ र जर्ज डकरेल १५ रनमा आउट भए ।

दक्षिण अफ्रिका स्पिनर तबरेज शाम्सीले १० ओभरमा ४६ रन खर्चेर ३ विकेट लिए । एन्डिले फेहलुपवयोले १० ओभरमा ५६ रन खर्चेर ३ विकेट लिए । केशव महाराजले १० ओभरमा १ मेडन सहित ५१ रन खर्चेर २ विकेट लिए । लिजाड विलियम्स र एनरिच नोर्कियाले एक एक विकेट लिए ।

त्यसअघि भ्रमण टोली दक्षिण अफ्रिकाले डुब्लिनमा टस जितेर ब्याटिङ गर्ने निर्णय लिदै निर्धारित ५० ओभरमा ४ विकेट गुमाउँदै ३ सय ४६ रन बनाएको थियो । दक्षिण अफ्रिका ओपनर जान्नेमान मलान १ सय ६९ बलमा १६ चौका र ६ छक्का सहित १ सय ७७ रनमा अविजित रहे । यो उनको अन्तर्राष्ट्रिय करिअरकै सर्वोत्कृष्ट प्रदर्शन हो । ओडिआई करिअरको दोस्रो शतक पर्दछ ।

डि कक ९१ बलमा ११ चौका र ५ छक्का सहित १ सय २० रनको उत्कृष्ट शतकीय इनिङ खेल्दै क्याच आउट भए । डि ककको यो ओडिआई करिअरको १६ औं शतक हो । पहिलो विकेटका लागि डि कक र मलानले ३६.१ ओभरमा २ सय २५ रनको दोहोरो शतकीय साझेदारीका साथ उत्कृष्ट ब्याटिङ गरेका थिए । डी ककलाई सिमि सिंहले मार्क आदिरबाट क्याच गराउँदै साझेदारी तोडेका थिए ।

रास्सी भान डर डुसेन २८ बलमा २ चौका सहित ३० रनमा क्याच आउट भए । हेनरिक क्लासेन ३ रनमा आउट भए । आयरल्यान्डका जोश लिटिलले सर्वाधिक २ विकेट लिए । सिमि सिंह र क्रेग यौंगको नाममा एक एक विकेट रह्यो । पहिलो खेल वर्षाको कारण रद्ध भएको थियो । दोस्रो खेलमा आयरल्यान्डले दक्षिण अफ्रिकालाई ४३ रनले स्तब्ध पारेको थियो । दक्षिण अफ्रिका र आयरल्यान्डबीच थप टि२० आई सिरिज हुने छ । पहिलो खेल सोमबार हुने छ ।