एजेन्सी – मध्यक्रमका ब्याट्सम्यान लियाम लिभिङस्टोनको विष्फोटक शतकका बाबजुद इंग्ल्यान्ड पहिलो टि२० खेलमा पाकिस्तानसँग ३१ रनले पराजित भएको छ । योसँगै तीन टि२० आई खेलमा पाकिस्तानले १–० को अग्रता लिएको छ ।

जितको लागि २ सय ३३ रनको विशाल विजयी लक्ष्य पछ्याएको इंग्ल्यान्ड १९.२ ओभरमा २ सय १ रनमा अल आउट भयो । लिभिङस्टोनले ४३ बलमा ६ चौका र ९ छक्का सहित १ सय ३ रनको उत्कृष्ट शतकीय इनिङ खेलेपनि अन्य खेलाडीको साथ नपाउँदा टोलीलाई जिताउन सकेनन् । लिभिङस्टोनको यो टि२० आई करिअरको पहिलो शतक हो । लिभिङस्टोन इंग्ल्यान्डबाट टि२० आईमा सर्वाधिक छिटो शतक बनाउने खेलाडी बनेका छन् । उनले ४२ बलमा शतक पूरा गरेका थिए । यसअघि इंग्ल्यान्डबाट टि२० आईमा डेविड मलान र एलेक्स हेल्सले मात्र टि२० आईमा शतक प्रहार गरेका छन् ।

ओपनर जेसन रोय १३ बलमा २ चौका र ३ छक्का सहित ३२ रन जोड्दै आउट भए । ओपनर डेविड मलान एक, जोनी बेयरस्टो ११, मोईन अली एक, ओईन मोर्गन १६, लुईस ग्रेगरी १० र डेविड विल्ली १६ रनमा आउट भए ।

पाकिस्तानका तीव्र गतिका बलर शाहिन अफ्रिदीले ३.२ ओभरमा ३० रन खर्चेर ३ विकेट लिँदै प्लेयर अफ द म्याच चुनिए । स्पिनर शादब खानले ४ ओभरमा ५२ रन खर्चेर ३ विकेट लिए । ईमाद वासिम, मोहम्मद हसनैन र हरिस रौफले एक एक विकेट लिए ।

त्यसअघि टस हारेर ब्याटिङ थालेको पाकिस्तानले निर्धारित २० ओभरमा ६ विकेट गुमाउँदै २ सय २३ रन बनाएको थियो । पाकिस्तानका कप्तान तथा ओपनर बाबर आजम ४९ बलमा ८ चौका र ३ छक्का सहित सर्वाधिक ८५ रनको योगदान दिए । अर्का ओपनर मोहम्मद रिजवानले ४१ बलमा ८ चौका र १ छक्का सहित ६३ रन जोडे ।

फखर जमान २६, मोहम्मद हफिज २४, सहिब मकसूदले १९ रनको योगदान दिए । पहिलो विकेटका लागि बाबर र रिजवानले १४.४ ओभरमा १ सय ५० रनको साझेदारी गर्दै विशाल योगफलको बाटोमा डोर्याएका थिए । इंग्ल्यान्डका टम करनले सर्वाधिक २ विकेट लिए । डेविड विल्ली, सकिब मोहम्मद र लुईस ग्रेगरीले एक एक विकेट लिए । दोस्रो खेल आईतबार हुने छ ।