एजेन्सी – ओपनर ईभिन लुईस र आन्द्रे रसेल चम्कँदा वेस्ट इन्डिजले अष्ट्रेलियामाथि पाँचौं तथा अन्तिम टि२० आई खेलमा १६ रनको जित निकालेको छ । योसँगै पाँच टि२० आई खेलको सिरिज वेस्ट इन्डिजले ४–१ ले जितेको छ ।

जितको लागि २ सय रनको बलियो लक्ष्य पछ्याएको अष्ट्रेलिया निर्धारित २० ओभरमा ९ विकेट गुमाउँदै १ सय ८३ रन बनायो । अष्ट्रेलिया कप्तान अरोन फिन्चले २३ बलमा ६ चौका सहित सर्वाधिक ३४ रनको योगदान दिए । मिचेल मार्श १५ बलमा ५ चौका र १ छक्का सहित ३० रनमा आउट भए । मोइजेस हेनरिक्स २१, एलेक्स केरी ९, म्याथ्यु वेड २६ र एन्ड्रयू टाई १५ रनमा आउट भए । जोश हेजलवुड १३ र मिचेल स्विपसन १४ रनमा अविजित रहे ।

वेस्ट इन्डिजका आन्द्रे रसेलले ४ ओभरमा ४३ रन खर्चेर ३ विकेट लिए । शेल्डन कटरेलले ४ ओभरमा २९ रन खर्चेर ३ विकेट लिए । हेडेन वाल्श जुनियरले एक विकेट लिए ।

त्यसअघि टस जितेर ब्याटिङ थालेको वेस्ट इन्डिजले निर्धारित २० ओभरमा ८ विकेट गुमाउँदै १ सय ९९ रन बनाएको थियो । वेस्ट इन्डिजका ओपनर ईभिन लुईसले ३४ बलमा ४ चौका र ९ छक्का सहित सर्वाधिक ७९ रनको योगदान दिए । कप्तान निकोलस पुरन १८ बलमा १ चौका र ३ छक्का सहित ३१ रन जोडे । ओपनर आन्द्रे फ्लेचर १२, क्रिस गेल र लेन्डन सिमन्स २१–२१ रनमा आउट भए ।

अष्ट्रेलिया तीव्र गतिका बलर एन्ड्रयू टाईले ४ ओभरमा ३७ रन खर्चेर ३ विकेट लिए । मिचेल मार्श र एडम जाम्पाले २–२ विकेट लिए । मिचेल स्विपसनको नाममा एक विकेट रह्यो । वेस्ट इन्डिज पहिलो खेलमा १८ रन, दोस्रो खेलमा ५६ रन र तेस्रो खेलमा ६ विकेट भएको थियो । चौथो खेलमा अष्ट्रेलिया ४ रनले विजयी भएको थियो । वेस्ट इन्डिज र अष्ट्रेलियाबीच थप तीन ओडिआई सिरिज हुने छ । पहिलो ओडिआई खेल बुधबार हुने छ ।