एजेन्सी – आगामी अक्टोबर नोभेम्बरमा यूएई र ओमानमा टि२० विश्वकप हुँदैछ । टि२० विश्वकपको लागि सबै टोलीले तीव्र तयारी अगाडि बढाएका छन् । विश्वकप तयारीमा रहेको विश्व क्रिकेटको पावर हाउस अष्ट्रेलियाले आफ्नो टि२० इतिहासकै खराब प्रदर्शन गर्न पुगेको छ । अष्ट्रेलियाले शनिबार वेस्ट इन्डिजसँगको पाँच टि२० आई सिरिज ४–१ ले गुमाएको छ ।

सुरुवाती तीनै खेलमा पराजित भएको अष्ट्रेलियाले चौथो खेलमा चार रनको रोमान्चक जित हात पारेको थियो । अन्तिम खेलमा १६ रनले पराजित भएको थियो । योसँगै अष्ट्रेलियाले लगातार चार टि२० आई सिरिज गुमाएको छ । अष्ट्रेलियाले आफ्नो टि२० आई क्रिकेट इतिहासमा लगातार चार टि२० आई सिरिज गुमाएको यो पहिलो पटक हो ।

अष्ट्रेलियाले इंग्ल्यान्डसँगको तीन टि२० आई सिरिज गतवर्ष सेप्टेम्बरमा २–१ ले गुमाएको थियो । गत डिसेम्बरमा घरेलु मैदानमा भारतसँग तीन टि२० आई सिरिज २–१ ले गुमाएको थियो । गत मार्चमा न्युजिल्यान्ड भ्रमण गर्दै पाँच टि२० आई सिरिज ३–२ ले गुमाएको थियो । यसअघि अष्ट्रेलियाले २०१९/२० मा भने लगातार चार टि२० सिरिज जितेको थियो ।

भारतलाई २०१९ मा घरेलु मैदानमा दुई टि२० सिरिजमा क्लिनस्विप गरेको थियो । श्रीलंकाविरुद्ध तीन टि२० सिरिजमा क्लिनस्विप, दक्षिण अफ्रिकाविरुद्ध तीन टि२० आई सिरिज २–० र न्युजिल्यान्डसँग तीन टि२० सिरिज २–१ ले जितेको हो । यसअघि २०१२/१३ मा अष्ट्रेलियाले लगातार तीन टि२० सिरिज गुमाएको थियो । २०१२ मा पाकिस्तानसँगको तीन टि२० आई सिरिज २-१ ले गुमाएको थियो ।

सन् २०१२ को टि२० विश्वकपपछि २०१३ जनवरीमा घरेलु मैदानमा श्रीलंकासँग दुई टि२० सिरिज क्लिनस्विप बेहोरेको थियो । फ्रेब्रअरीमा वेस्ट इन्डिजसँगको एक मात्र टि२० खेल पनि गुमाएको थियो । त्यसैवर्ष इंग्ल्यान्डसँगको दुई टि२० सिरिज एकमा जितका साथ उपाधि बाँडेको थियो । २०२०/२१ मा अष्ट्रेलियाले १६ टि२० आई खेल खेल्दा पाँच खेलमा जित र ११ खेलमा हार बेहोर्नु परेको छ ।

अष्ट्रेलिया प्रदर्शन किन कमजोर ?

वेस्ट इन्डिज भ्रमणमा अष्ट्रेलिया प्रमुख ब्याट्सम्यान स्टिभ स्मिथ, डेविड वार्नर, मार्कस स्टोइनिस र ग्लेन म्याक्सवेल थिएनन् । जसको कारण उसको ब्याटिङ शीर्षक्रमका ब्याट्सम्यानमा निर्भर हुँदा कमजोर थियो । वेस्ट इन्डिज भ्रमणमा मिचेल मार्शले उत्कृष्ट लयका साथ तीन अर्धशतक प्रहार गर्दै कुल २ सय १९ रन जोडेका थिए । कप्तान आरोन फिन्चले एक अर्धशतक सहित १ सय २७ रन बनाए ।

अन्य कुनै पनि खेलाडीले एक सय रन बनाउन सकेनन् । प्रमुख ब्याट्सम्यान तथा कप्तान फिन्चनै खराब लयबाट गुज्रिएका छन् । युवा ब्याट्सम्यान जोश फिलिपे, विकेटकिपर म्याथ्यु वेड, मोईजेस हेनरिक्स जस्ता ब्याट्सम्यान चल्न नसक्दा पराजित हुन पुगेको थियो । अष्ट्रेलिया पछिल्लो समय खराब प्रर्दशन गर्नुको कारण कमजोर ब्याटिङनै मुख्य कारण बन्दै आएको छ । प्रमुख ब्याट्सम्यान वार्नर, फिन्च र स्मिथको फम खराब चल्दा पनि संघर्ष गर्नु परेको छ ।