एजेन्सी – इंग्ल्यान्डले दोस्रो टि२० आई खेलमा पाकिस्तानलाई २ सय १ रनको बलियो लक्ष्य दिएको छ । लिड्समा टस हारेर ब्याटिङको निम्तो पाएको इंग्ल्यान्ड १९.५ ओभरमा २ सय रनमा अल आउट भयो ।

इंग्ल्यान्डका कप्तान जस बटलरले ३९ बलमा ७ चौका र २ छक्का सहित सर्वाधिक ५९ रनको योगदान दिए । इंग्ल्यान्डले पहिलो ओभरको चौथो बलमै ओपनर जेसन रोयलाई १० रनमा गुमाएको थियो । स्पिनर ईमाद वासिमको बलमा रोय मोहम्मद हफिजबाट क्याच आउट हुन पुगेका थिए । ईमादलेनै तेस्रो ओभरको तेस्रो बलमा डेविड मलानलाई आजम खानबाट एक रनमा क्याच आउट गराउँदा इंग्ल्यान्ड १८–२ को कमजोर अवस्थामा पुगेको थियो । तर त्यसपछि बटलर र मोईन अलीले आक्रामक ब्याटिङ गर्दै विशाल योगफलको बाटो देखाएका थिए ।

तेस्रो विकेटका लागि मोईन र बटलरले ३१ बलमा ६७ रनको उत्कृष्ट साझेदारी गरेका थिए । आठौं ओभरको चौथो बलमा बाबर आजमबाट क्याच आउट हुनुअघि मोईन अलीले १६ बलमा ६ चौका र १ छक्का सहित ३६ रन जोड्दै उत्कृष्ट सुरुवात दिलाएका थिए । मोहम्मद हसनैनको १४ औं ओभरको दोस्रो बलमा बटलर बाबरबाट क्याच आउट हुन पुगेका थिए ।

जोनी बेयरस्टो ७ बलमा २ चौका सहित १३ रनमा क्याच आउट भए । पहिलो खेलमा सानदार शतक प्रहार गरेका लियाम लिभिङस्टोन २३ बलमा ३ छक्का र २ चौका सहित ३८ रनमा रन आउट भएपछि विशाल योगफलको सम्भावना कठिन बनेको थियो । लिभिङस्टोनले १६ औं ओभरको पहिलो बलमा हरिस रौफलाई प्रहार गरेको बल स्टेडियमनै कटेको थियो । क्रिस जोर्डन १३ र टम करन ९ रनमा आउट भए ।

पाकिस्तानका ईमाद वासिमले ४ ओभरमा ३७ रन खर्चेर २ विकेट लिए । युवा तीव्र गतिका बलर मोहम्मद हसनैनले ४ ओभरमा ५१ रन खर्चेर ३ विकेट लिए । हरिस रौफले ४ ओभरमा रन खर्चेर २ विकेट लिए । शादब खान र शाहिन शाह अफ्रिदीले नाममा समान एक एक विकेट रह्यो ।