एजेन्सी – दक्षिण अफ्रिका स्पिनर तरबेज शाम्सीलाई इन्डियन प्रिमियर लिग (आइपिएल) २०२१ को बाँकी सिजनका लागि राजस्थान रोयल्सले टोलीमा अनुबन्ध गरेको छ ।

राजस्थानले अष्ट्रेलिया तीव्र गतिका बलर एन्ड्रयू टाईको स्थानमा शाम्सीलाई अनुबन्ध गरेको हो । शाम्सी वर्तमान टि२० विश्व वरीयता नम्वरवान् बलर हुन् । अन्तर्राष्ट्रिय टि२० आई क्रिकेटमा लगातार प्रदर्शन गर्दै आएमा शाम्सीले दुई टेस्ट, २७ ओडिआई र ३९ टि२० आई खेलेका छन् । अन्य विदेशी फ्रेन्चाइज लिगमा लगातार उत्कृष्ट प्रदर्शन गर्दै आएका छन् ।

३१ वर्षिय उनले १ सय ६३ टि२० खेलमा १ सय ८३ विकेट लिएका छन् । उत्कृष्ट प्रदर्शन ४–१० छ । उनले टेस्टमा ६, ओडिआईमा ३२, टि२० आईमा ४५ विकेट लिएका छन् । शाम्सीले दक्षिण अफ्रिका र फ्रेन्चाइज लिग दुबैमा पछिल्लो समय सानदार प्रदर्शन गर्दै आएका छन् ।
टाईले टि२० विश्वकपको कारण आफ्नो नाम फिर्ता लिएको बुझिएको छ । तर उनले अष्ट्रेलिया अन्तिम टि२० विश्वकप टोलीमा आफ्नो स्थान सुरक्षित गर्न सकेनन् ।

बाँकी सिजनको लागि राजस्थानले दोस्रो खेलाडी परिवर्तन गरेको हो । इंग्ल्यान्डका जस बटलरले ब्यक्तिगत कारण नखेल्ने भएका छन् । बटलरको स्थानमा राजस्थानले न्युजिल्यान्डका विकेटकिपर ग्लेन फिलिप्सलाई अनुबन्धगरेको छ । इंग्ल्यान्डका स्टार अलराउन्डर बेन स्टोक्स र तीव्र गतिका बलर जोफ्रा आर्चरले पनि चोटका कारण बाँकी आइपिएल खेल्ने छैनन् ।

बंगलादेशका तीव्र गतिका बलर मुश्ताफिजुर रहमानले पनि नखेल्ने निश्चित छ । राजस्थानमा इंग्ल्यान्डका आक्रामक ब्याट्सम्यान लियाम लिभिङस्टोन पनि छन् । दक्षिण अफ्रिकी अलराउन्डर क्रिस मोरिस पनि राजस्थानमै छन् । बाँकी आइपिएलका खेलहरु आगमी सेप्टेम्बर १९ देखि अक्टोबर १५ सम्म यूएईमा चल्ने छ । गत वैशाखमा कोरोना कारण आइपिएल अनिश्चित समयमा स्थगित भएको थियो ।

२०२१ को आधा सिजन सकिँदा राजस्थान ७ खेलमा ४ मा हार र ३ मा जित सहित ६ अंक जोड्दै पाँचौ स्थानमा छ । राजस्थानले पन्जाब किंग्ससँग पहिलो खेल सेप्टेम्बर २१ मा खेल्ने छ । कप्तान सञ्जु स्यामसनलाई उत्कृष्ट प्रदर्शनको दबाब छ । शीर्ष चारमा रहँदै प्ले अफमा स्थान बनाउन बाँकी खेलमा उत्कृष्ट नजिता निकाल्नुपर्ने हुन्छ ।