काठमाडौं (हाम्रो खेलकुद) – कर्णालीका कप्तान तथा युवा ब्याट्सम्यान रविन्द्र जंग शाहीले चौथो संस्करणको एभरेष्ट प्रिमियर लिग (इपिएल) पोखरा राइनोजबाट खेल्ने भएका छन् ।

शुक्रबार काठमाडौंमा भएको अक्सनमा पोखराले रविन्द्रलाई न्यूनतम मूल्य ५० हजारमा अनुबन्ध गरेको हो । कारोना महामारीको कारण टोलीमा एक एक जना सङ्ख्या बढाइएको छ । नेपालका लागि यु१९ क्रिकेट खेलि सकेका रविन्द्रले कर्णालीबाट घरेलु क्रिकेट खेल्दै आएका छन् । त्यस्तै फ्रेन्चाइज टोलीले विभिन्न कारण खाली भएको कोटामा पनि नयाँ खेलाडी पूर्ति गरेका छन् ।

कर्णालीका कर्णधार रविन्द्र शीर्षक्रममा ब्याटिङसँगै स्पिन बलिङ गर्ने गर्दछन् । रविन्द्रले पोखरा प्रिमियर लिग बुटवल ब्लास्टरबाट खेलि सकेका छन् । रविन्द्र ब्याटिङ, बलिङ र फिल्डिङ तीनै क्षेत्रमा अब्बल मानिन्छन् । कर्णालीको कमजोर प्रदर्शनको कारण उनको राम्रो प्रदर्शन पनि घरेलु क्रिकेटमा ओझेलमा पर्दै आएको छ । रविन्द्र हाल भारतमा क्रिकेट अभ्यास गरि रहेका छन् ।

‘इपिएल खेल्न निकै उत्साहित छु । इपिएलमा राम्रो गर्ने सोच छ । इपिएलमा म पहिलो पटक अनुबन्ध भएको हुँ’, रविन्द्रले हाम्रो खेलकुदसँग बोल्दै भने । त्यसैमा उनले थपे, ‘इपिएलमा विदेशी राम्रो खेलाडी आउँछन् । ति विदेशी खेलाडीबाट नयाँ कुरा सिक्न पाउने छु । नेपाली टोलीका सिनियर खेलाडीबाट पनि धेरै कुराहरु सिकिने छ’ ।

‘आफूलाई जुन जिम्मेवारी दिएपनि निर्वाह गर्न हर प्रयास गर्ने छु । नयाँ कुराहरु सिक्न निकै उत्साहित छु’, भारतको जयपुरमा क्रिकेट सिकि रहेका रविन्द्रले भने । रविन्द्रले टोलीमा अनुबन्ध गरेकोमा पोखरालाई धन्यावाद पनि दिए ।

पोखरामा विकेटकिपर विनोद भण्डारी, सुनिल धमला, रित गौतम, किशोर महतो, बिक्रम शोब, बिपिन खत्री, लोकेश बम, पृथु बास्कोटा, विवेक यादव र विपिन रावल लगाएतका खेलाडी छन् । पोखराले यस पटक विदेशी खेलाडीको नाम सार्वजनिक गरेको छैन ।

गतवर्ष वेस्टइन्डिजका आक्रामक ब्याट्सम्यान क्रिस गेललाई अनुबन्ध गरेको थियो । तर उनी टि२० विश्वकपको कारण नआउने भएका छन् । इपिएल असोज ९ देखि २३ सम्म टियुमा हुने छ । पोखराले विदेशी खेलाडी सम्झौता अन्तिम चरणमा पुर्याएको छ ।