एजेन्सी – मुम्बईसँग दोस्रो एकदिवसिय अभ्यास खेलमा ओमान २ सय ३१ रनको फराकिलो अन्तरले पराजित भएको छ । योसँगै तीन एकदिवसिय अभ्यास खेलको सिरिज मुम्बईले एक खेल अगावै २–० ले जितेको छ ।

जितको लागि ३ सय १ रनको बलियो विजयी लक्ष्य पछ्याएको ओमान २२.५ ओभरमा मात्र ६९ रनमा अल आउट हुन पुग्यो । ओमानका मोहम्मद नदिमले ६२ बलमा ३ चौका र १ छक्का सहित सर्वाधिक ३५ रन बनाए । ओमानका ९ खेलाडीले दोहोरो अंकमा रन बनाउन सकेनन् । ओपनर शोहिब खान १०, जतिन्दर सिंह शून्य, कप्तान अकिब इलायस ८, सन्दीप गौड र सुरज कुमारले खाता खोल्न सकेनन् ।

मुम्बईका तीव्र गतिका बलर मोहित अवस्थीले ६ ओभरमा ३१ रन खर्चेर ४ विकेट लिए । ध्रुमिल मतकरले ५.५ ओभरमा २१ रन खर्चेर ३ विकेट लिए । दीपक सिठ्ठी दुई र अमन खानले एक विकेट लिए ।

त्यसअघि टस हारेर ब्याटिङ थालेको मुम्बईले निर्धारित ५० ओभरमा ८ विकेट गुमाउँदै ३ सय रन बनाएको थियो । मुम्बईका लागि अर्मान जफारले १ सय १४ बलमा ११ चौका र ३ छक्का सहित १ सय २२ रनको शतकीय इनिङ खेले । सुजित नायक ७० बलमा ६ चौका सहित ७३ रनमा अविजित रहे । चिमानी सुतार ३७ र यशस्वी जैसवाल २७ रनमा आउट भए ।

ओमानका मोहम्मद नदीमले ९ ओभरमा ६७ रन खर्चेर ४ विकेट लिए । निस्टर धम्बाले २, अकिब इलायस र कलिमुल्लाहले एक एक विकेट लिए । मुम्बईसँगको अन्तिम तथा तेस्रो अभ्यास खेल बिहिबार हुने छ ।

यसअघि तीन टि२० खेलको सिरिज मुम्बईले २- १ ले गुमाएको थियो । ओमानले टि२० विश्वकप र आइसिसी विश्वकप लिग–२ अन्तर्गत दुई त्रिकोणात्मक ओडिआई सिरिजको लागि मुम्बईसँग समान तीन टि२० र तीन एकदिवसय सिरिज खेलेको हो ।

नेपाल, अमेरिका र ओमानबीचको त्रिकोणात्मक सिरिज १३ सेप्टेम्बर देखि २० सम्म चल्ने छ । त्यसपछि पपुपा न्युगिनी र स्कटल्यान्डसँग ओमानले ओडिआई त्रिकोणात्मक सिरिज खेल्ने छ । नेपाल र ओमानबीचको पहिलो खेल भदौ २९ (सेप्टेम्बर १४ ) मा हुने छ ।