काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिएल) मा बुधबार हुने पहिलो खेल ललितपुर प्याट्रियटर्सविरुद्ध पोखरा राइनोजले पहिला बलिङ गर्ने भएको छ । टियु मैदानमा भएको टसमा पोखरा कप्तान विनोद भण्डारीले टस जितेर पहिला बलिङ गर्ने निर्णय लिएका छन् ।

भिजेको आउटफिल्डको खेल निर्धारित समय भन्दा दुई घण्टा भन्दा ढिला सुरु हुने भएपछि ओभर घटाइएको छ । खेल ७-७ ओभरको हुनेछ । दुबै टोलीका कप्तान, प्रशिक्षक र अम्पायरबीचको लामो छलफलपछि खेल खेल्ने निर्णय लिएका हुन् । खेल १२ बजेदेखि सुरु हुनेछ ।

युवा ब्याट्सम्यान रित गौतमले खेलमा डेब्यू गरेका छन् । पोखराले आजको खेलमा विपिन रावल र असेला गुणरत्नेलाई बाहिर छन् । रित गौतम र साहन आर्चचिगेलाई मौका दिएको छ । ललितपुरले आजको खेल दुई परिवर्तन गरेको छ । स्पिनर ललित नारायण राजवंशी र भुटानका मिक्यो दोर्जीलाई बाहिर राखेको छ । सन्दीप जोरा र अजमतुल्लाह ओमरजाईलाई खेलाएको छ ।

आज दोस्रो खेलमा भैरहवा ग्ल्याडियटर्स र विराटनगर वारियर्सबीचको खेल हुनेछ । वर्षा र भिजेको आउटफिल्डको कारण सोमबार र मंगलबारका खेल लगातार स्थगित भएपछि इपिएलले २४ घण्टा बित्न नपाउँदै दुई पटक खेल तालिका परिवर्तन गरेको थियो । इपिएलले सोमबार राती नयाँ तालिका सार्वजनिक गरेको थियो । तर मंगलबारको पनि खेल हुन नसकेपछि पुन नयाँ तालिका सार्वजनिक गरेको थियो। सोमबार तालिका अनुसार चितवन टाइगर्सले लगातार चार खेल खेल्नुपर्ने थियो । इपिएलले एक पटक स्थगित भएका खेलहरु अब वर्षाको कारण पुनः स्थगित भएमा अंक बाँडिने जनाएको छ ।

बुधबार र बिहिबार पनि काठमाडौंमा वर्षाको सम्भावना छ । मंगलबार पोखरा र काठमाडौंबीचको खेल स्थगित भएको थियो । सोमबार पहिलो खेलमा काठमाडौं र विराटनगर तथा भैरहवा ग्ल्याडियटर्स र चितवन टाइगर्सबीचको खेल स्थगित भएको थियो । आइतबार दोस्रो खेलमा पोखरा भैरहवाबीचको खेल वर्षाको कारण रद्ध भएको थियो । भैरहवा र पोखराबीचको खेल दुबै टोलीले अंक बाँडेका थिए ।

ललितपुरको प्लेइङ ११ :

कुशल भुर्तेल (कप्तान) सन्दीप जोरा, राशिद खान, पवन सरार्फ, योगेन्द्रसिंह कार्की, रिजन ढकाल, शंखर राना, नारायण जोशी, सन्दुन वीराक्कोडी, ओशदा फर्नान्डो, अजमतुल्लाह ओमरजाई ।

पोखरा प्लेइङ ११ :

विनोद भण्डारी (कप्तान), सुनिल धमला, रित गौतम, विक्रम सोब, लोकेश बम, विवेक यादव, रिचर्ड लेभी, केस्रिक विलियम्स, सहान अर्चाचिगे, नन्दन यादव र सुशान भारी ।