एजेन्सी – आइसिसी टि२० विश्वकप २०२१ मा न्युजिल्यान्डले स्कटल्यान्डलाई १६ रनले पराजित गरेको छ । सुपर १२ को समूह २ मा रहेको न्युजिल्यान्डले दोस्रो जितका साथ सेमिफाइनल सम्भावना बलियो बनाएको छ ।

जितको लागि १ सय ७३ रनको विजयी लक्ष्य पछ्याएको स्कटल्यान्डले निर्धारित २० ओभरमा ५ विकेट गुमाउँदै १ सय ५६ रन बनायो । स्कटल्यान्डका माइकल लिस्क २० बलमा ३ चौका र ३ छक्का सहित ४२ रनमा अविजित रहे ।

विकेटकिपर म्याथ्यु क्रसले २९ बलमा ५ चौका सहित २७ रन जोडे । क्रसले तीव्र गतिका बलर एडम मिल्नेलाई छैटौं ओभरमा लगातार पाँचा चौका प्रहार गरेका थिए । ओपनर जर्ज मुन्शेले १८ बलमा २ छक्का र १ चौका सहित २२ रनमा आउट भए । कप्तान काइल कोट्जर १७, रिची बेरिङ्टनले २० रन बनाए ।

स्कटल्यान्डले राम्रो सुरुवात गरेपनि त्यसलाई निरन्तरता दिन नसक्दा जित निकाल्न नसकेको हो । एक समय समय स्कटल्यान्डले ७.५ ओभरमा ६६–२ को अवस्थामा थियो । तीव्र गतिका बलर ट्रन्ट बोल्टले कोट्जरलाई टिम साउथीलाई क्याच गराएपछि न्युजिल्यान्ड खेलमा फर्किएको थियो ।
न्युजिल्यान्डका तीव्र गतिका बलर ट्रेन्ट बोल्टले ४ ओभरमा २९ रन खर्चेर २ विकेट लिए । ईश सोधीले ४ ओभरमा ४२ रन खर्चेर २ विकेट लिए । टिम साउथीले १ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ५ विकेट गुमाउँदै १ सय ७२ रन बनाएको थियो । न्युजिल्यान्डका ओपनर मार्टिन गुप्टिलले ५६ बलमा ६ चौका र ७ छक्का सहित सर्वाधिक ९३ रनको योगदान दिए । ब्राडली व्हीलले १९ औं ओभरको तेस्रो बलमा कलम म्याकलडबाट क्याच गराएपछि गुप्टिल शतक बनाउन चुकेका थिए । ग्लेन फिल्पिस ३७ बलमा १ छक्का सहित ३३ रनमा क्याच आउट भए ।

खराब सुरुवात गरेको न्युजिल्यान्डलाई चौथो विकेटका लागि गुप्टिल र फिलिप्सले १ सय ५ रनको महत्वपूर्ण शतकीय साझेदारी गर्दै बलियो योगफलमा पुर्याएका थिए । पाँचौं ओभरमा न्युजिल्यान्डले प्रमुख दुई विकेट गुमाएको थियो । पाँचौं ओभरको पहिलो बलमा सफ्यान शारीफले १३ रनमा एलबीडब्लू आउट गर्दै स्कटल्यान्डलाई पहिलो सफलता दिलाएका थिए ।

चार बलपछि कप्तान केन विलियम्सन शून्यमा म्याथ्यु क्रसबाट क्याच आउट भएका थिए । मार्क वाटले छैटौं ओभरको पहिलो बलमा डेवन कन्वेलाई १ रनमा क्रसबाटै क्याच गराएपछि ५२–३ को कमजोर अवस्थामा पुगेको थियो । जेम्श निसम ८ र मिचेल सान्टनार २ रनमा अविजित रहे ।

स्कटल्यान्डका सफ्यान शारिफले ४ ओभरमा २८ रन खर्चेर सर्वाधिक २ विकेट लिए । ब्राडली व्हीलले ४ ओभरमा ४० रन खर्चेर २ विकेट लिए । मार्क वाटले ४ ओभरमा १३ रन खर्चेर १ विकेट लिए ।

न्युजिल्यान्ड पहिलो खेलमा पाकिस्तानसँग ५ विकेटले पराजित भएको थियो । दोस्रो खेलमा भारतलाई ८ विकेटले हराएको थियो । न्युजिल्यान्डले अव शुक्रबार नामिबिया र आइतबार अफगानिस्तानसँग खेल्नेछ । यी दुबै खेलमा विजयी भएमा न्युजिल्यान्ड सेमिफाइनलमा पुग्नेछ । आज अन्तिम खेलमा अफगानिस्तानले भारतसँग खेल्नेछ । उक्त खेलमा अफगानिस्तान पराजित भएमा न्युजिल्यान्डको लागि सहज बन्नेछ । पाकिस्तान ४ खेलमा ४ मानै जितका साथ शीर्ष स्थानमा रहँदै सेमिफाइनलमा पुगि सकेको छ । स्कटल्यान्ड यो हारसँगै सुपर १२ बाट बाहिरिएको छ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंकका साथ दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ४ खेलमा ४ मानै पराजित हुँदै पुछारमा छ । श्रीलंका र बंगलादेश बाहिरि सकेका छन् ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड ३ खेलमा २ मा जित र १ मा हार सहित नेटरनरेटको आधारमा तेस्रो स्थानमा छ । नामिबिया ३ खेलमा १ मा जित र २ मा हार सहित चौथो स्थानमा छ । भारत २ खेलमा अंक बिहीन हुँदै पाँचौं स्थानमा छ । स्कटल्यान्ड सुरुवाती ३ खेलमा हारका साथ बाहिरिएको छ ।