एजेन्सी – भारतीय क्रिकेट टोलीको मुख्य प्रशिक्षकमा भारतीय क्रिकेट टोलीका पूर्व कप्तान राहुल द्रविड नियुक्त भएका छन् । युएईमा जारी टि२० विश्वकपसँगै मुख्य प्रशिक्षक रवि शास्त्रीको अवधि सकिँदै छ । जसको कारण भारतले द्रविडलाई मुख्य प्रशिक्षकमा नियुक्त गरेको हो । नोभेम्बर १७ देखि घरेलु मैदानमा न्युजिल्यान्डसँग हुने तीन टि२० आई सिरिजसँगै दव्रिडले भारतीय टोली सम्हाल्नेछन् ।

राहुल भारतीय क्रिकेटका पूर्व एक सफल कप्तान र ब्याटरमा पर्दछन् । अर्कोतर्फ उमेर समूह, नेशनल क्रिकेट एकेडेमी (एनसिए) र भारत ए को टोलीमा प्रशिक्षकको रुपमा द्रविडले उत्कृष्ट प्रभाव छाडि सकेका छन् । विशेष गरि एनसिएसमा उनको भूमिका निकै महत्वपूर्ण छ । भारतीय बेन्च स्ट्रेन्थ बलियो हुनुमा दव्रिडको ठूलो हात छ । समग्रमा उनी सफल पूर्व कप्तान, खेलाडी तथा भारतीय उमेर समूह र एनसियमा ठूलो परिवर्तन ल्याएका प्रशिक्षक हुन् ।

द्रविडले मुख्य प्रशिक्षको भूमिका निर्वाह गर्न उत्सुक रहेको जनाएका छन् । ‘शास्त्रीको टोलीले धेरै राम्रो काम गरेको छन् । म त्यसलाई अगाडि बढाउने काम गर्नेछु । एनसिए, यू१९ र भारत ए मा धेरै खेलाडीहरुसँग धेरै नजिकबाट काम गरेको छु । हरेक दिन खेलाडीहरु सिक्न चाहन्छन् । आगमी दुई वर्षमा केहि ठूला प्रतियोगिताहरु छन् । ति उपलब्धी गर्न मैले तप्पर भएर काम गर्नेछु’, द्रविडले भने ।

बिसिसिआईका अध्यक्ष तथा घनिष्ट साथी सौरभले द्रविडलाई मुख्य प्रशिक्षकको रुपमा स्वागत गर्दै खुसी ब्यक्त गरेका छन् । गांगुलीले एनसिएमा उनले ल्याएको परिवर्तनको प्रशंसा गर्दै भारतीय टोलीलाई नयाँ उचाईमा पुर्याउनेमा विश्वस्त रहेको बताएका छन् ।

गत जुलाईमा दव्रिडको प्रशिक्षणमा भारतले श्रीलंकासँग तीन ओडिआई र तीन टि२० आई सिरिज खेलेको थियो । सन् २०१८ मा द्रविडकै प्रशिक्षकमा भारतले यू१९ विश्वकप उपाधि जितेको थियो । २०१६ र २०२० को यू१९ विश्वकपमा भारत फाइनलमा पराजित भएको थियो । दव्रिडले भारत ए टोली हेर्दै आएका छन् ।

रवि शास्त्री २०१७ मा भारतीय क्रिकेट टोलीको मुख्य प्रशिक्षकमा नियुक्त भएका थिए । तत्कालिन प्रशिक्षक अनिल कुम्बलेले जुलाई २०१७ मा कप्तान विराट कोहलीसँगको तितो सम्बन्धको कारण प्रशिक्षक छाडेपछि शास्त्री प्रशिक्षकमा नियुक्त भएका थिए । शास्त्रीको प्रशिक्षणमा भारतले विश्वकप उपाधि जित्न नसकेपनि विश्व क्रिकेटमा तीनै शैलीको क्रिकेटमा उत्कृष्ट प्रदर्शन गरेको छ ।

गत डिसेम्बरमा अष्ट्रेलियासँग टेस्ट सिरिज र यस इंग्ल्यान्डसँग टेस्ट सिरिजमा उत्कृष्ट प्रदर्शन गरेको थियो । २०१९ को एकदिवसिय विश्वकपमा भारत सेमिफाइनलबाट बाहिरिएको थियो । टि२० विश्वकप २०२१ मा समूह चरणबाटै बाहिरिने संघारमा छ ।