एजेन्सी – भारतले आइसिसी टि२० विश्वकप २०२१ मा पहिलो जित हात पारेको छ । सुपर १२ को समूह २ मा रहेको भारतले बुधबार राती अफगानिस्तानलाई ६६ रनले हराउँदै सेमिफाइनलको झिनो अंक गणीतिय आशा कायमै राखेको छ ।

जितको लागि २ सय ११ रनको विशाल विजयी लक्ष्य पछ्याएको अफगानिस्तानले निर्धारित २० ओभरमा ७ विकेट गुमाउँदै १ सय ४४ रन बनायो । अफगानिस्तानका करिम जन्नत २२ बलमा ३ चौका र २ छक्का सहित ४२ रनमा अविजित रहे । मोहम्मद नाबीले ३२ बलमा २ चौका र १ छक्का सहित ३५ रन बनाए । ओपनर हज्रातुल्लाह जजाई १३, मोहम्मद शाहजाद शून्य र रहमानउल्लाह गुर्बाज १९ रनमा आउट भए । गुर्बाजले १० बलमा १ चौका र २ छक्का प्रहार गरे । गुलबदीन नइब १८ र नाजिबउल्लाह जद्रान ११ रनमा आउट भए ।

भारतका तीव्र गतिका बलर मोहम्मद शामीले ४ ओभरमा ३२ रन खर्चेर सर्वाधिक ३ विकेट लिए । स्पिनर रविचन्द्रन आश्विनले ४ ओभरमा १४ रन खर्चेर २ विकेट लिए । जस्प्रित बुमराह र रविन्द्र जडेजाले १–१ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङ थालेको भारतले निर्धारित २० ओभरमा २ विकेट गुमाउँदै २ सय १० रन बनाएको थियो । भारतका ओपनर रोहित शर्माले ४७ बलमा ८ चौका र ३ छक्का सहित सर्वाधिक ७४ रनको योगदान दिए । लोकेश राहुलले ४८ बलमा ६ चौका र २ छक्का सहित ६९ रनमा बोल्ड आउट भए ।

भारतलाई ओपनर रोहित शर्मा र लोकेश राहुलले पहिलो विकेटका लागि १४.४ ओभरमा १ सय ४० रनको उत्कृष्ट शतकीय साझेदारीका साथ उत्कृष्ट सुरुवात दिलाएका थिए । त्यसपछि ऋषभ पन्त र हार्दिक पान्ड्याले उत्कृष्ट अन्त्यका साथ विशाल योगफलमा पुर्याएका हुन् । तीव्र गतिका बलर करिम जन्नतले रोहितलाई मोहम्मद नाबीबाट क्याच गराउँदै साझेदारी तोडेका थिए । अर्का तीव्र गतिका बलर गुलबदीन नाइबले राहुललाई बोल्ड आउट गरेका थिए ।

विकेटकिपर ऋषभ पन्त १३ बलमा १ चौका र ३ छक्का सहित २७ रनमा अविजित रहे । हार्दिक पान्ड्या १३ बलमा ४ चौका र २ छक्का सहित ३५ रनमा अविजित रहे । तेस्रो विकेटका लागि हार्दिक र ऋषभले २१ बलमा ६३ रनको उत्कृष्ट अविजित साझेदारी गरेका थिए । अफगानिस्तानका करिम जन्नत र गुलबदी नाईबले १–१ विकेट लिए ।

भारत पहिलो खेलमा पाकिस्तानसँग १० विकेट र न्युजिल्यान्डसँग ८ विकेटले पराजित भएको थियो । शुक्रबार भारतले स्कटल्यान्डसँग खेल्नेछ । सोमबार नामिबियासँग खेल्नेछ । यी दुबै खेलमा भारतले फराकिलो जित निकालेर मात्र सेमिफाइनलमा पुग्न सक्दैन । न्युजिल्यान्डले बाँकी दुई खेल मध्य एक खेलमा हारेको खण्डमा मात्र नेटरनरेटको झिनो आशा बच्नेछ । न्युजिल्यान्डले शुक्रबार नामिबिया र आइतबार अफगानिस्तानसँग खेल्नेछ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । इंग्ल्यान्ड सेमिफाइनलमा पुगि सकेको छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंकका साथ दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ४ खेलमा ४ मानै पराजित हुँदै पुछारमा छ । श्रीलंका र बंगलादेश बाहिरि सकेका छन् ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । पाकिस्तान सेमिफाइनलमा पुगि सकेको छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड ३ खेलमा २ मा जित र १ मा हार सहित नेटरनरेटको आधारमा तेस्रो स्थानमा छ । नामिबिया ३ खेलमा १ मा जित र २ मा हार सहित पाँचौं स्थानमा छ । भारत ३ खेलमा १ मा जित र २ मा हारका साथ चौथो स्थानमा छ । स्कटल्यान्ड सुरुवाती ३ खेलमा हारका साथ बाहिरिएको छ ।