एजेन्सी – अष्ट्रेलिया चर्चित टि२० फ्रेन्चाइज प्रतियोगिता बिग ब्यास लिगमा पहिलो पटक भारतीय खेलाडी अनुबन्ध भएका छन् । भारतीय पूर्व यू१९ विश्वकप कप्तान उन्मुक्त चन्दलाई मेलबर्न रेनेगड्सले टोलीमा अनुबन्ध गरोको छ । २८ वर्षिय चन्द योसँगै बिग ब्यासमा अनुबन्ध हुने पहिलो भारतीय खेलाडी बनेका छन् ।

२८ वर्षको उमेरमै भारतीय क्रिकेटबाट सन्न्यास लिएका चन्दले अमेरिकाबाट क्रिकेट खेल्ने तयारीमा छन् । भारतको सिनियर टोलीमा मौका नपाएपछि सन्न्यासको घोषणा गर्दै अमेरिका गएका थिए । जसको कारण उनलाई विदेशी फ्रेन्चाइज लिग खेल्न बाटो खुलेको हो ।
भारतीय महिला क्रिकेटरले भने विग ब्यास खेलि सकेका छन् । तर भारतीय घरेलु प्रतियोगिता भएको अनुबन्ध खेलाडीले विदेशमा खेल्न नपाउने हुँदा हालसम्म बिग ब्यास खेलेका थिएनन् ।

गतवर्ष पूर्वकप्तान महेन्द्रसिंह धोनी र युवराज सिंह पनि बिग ब्यास खेल्ने चर्चा थियो । तर खेलेनन् । ‘विग ब्यास विश्वकै एक उत्कृष्ट प्रतियोगिता हो । म सधैं यहाँ खेल्न चाहन्थे । मैले यस सिजनमा राम्रो खेल्दै नाम बनाउन सक्छु र मैले जित्ने टोलीलाई उपाधि जिताउन चाहन्छु’, चन्द्रले अनुबन्ध भएपछि भनेका छन् ।

‘यसअघि म मेलबर्न गएको थिएन । मलाई थाहा छ मेलबर्नमा धेरै भारतीय मानिसहरु बस्छन् । उनीहरु खेल हेर्न आउनेमा मलाई आशा छ । त्यसैले राम्रो हुनेछ’, चन्दले भने । मेलबर्न रेनेगड्सको टोलीको कप्तानी आरोन फिन्चले गर्नेछन् । मेलबर्न रेनेगड्समा फिन्च, शन मार्श, जेम्स प्याटिसन, केन रिचर्ड्सन र इंग्ल्यान्डका रोस टोपली जस्ता खेलाडी छन् । बिग ब्यास २०२१–२२ डिसेम्बर ५ देखि जनवरी २८ सम्म चल्नेछ ।

एक समय चन्दलाई भारतीय क्रिकेटको ब्याटिङको भविष्य मानिएको थियो । तर भारतीय क्रिकेटमा तीव्र प्रतिस्पर्धामा उनले आफ्नो स्थान बनाउन सकेनन् । चन्दको कप्तानीमा भारतले सन् २०१२ मा यू१९ विश्वकप जितेको थियो । चन्दले फाइनलमा अष्ट्रेलियालाई ६ विकेटले हराउँदै भारतलाई उपाधि जिताउँदा १ सय ३० बलमा ७ चौका र ६ छक्का सहित कुल १ सय ११ रनको उत्कृष्ट शतकीय इनिङ खेलेका थिए ।

उनले आइपिएल दिल्ली क्यापिटल्स, मुम्बई इन्डियन्स र राजस्थान रोयल्सबाट खेलेका छन् । सुरुवाती समय दिल्लीबाट घरेलु क्रिकेट खेलेका उनले त्यहाँ राम्रो मौका नपाएपछि पछिल्लो समय उत्तरखण्डबाट खेलेका थिए । चन्दले ७७ प्रथम श्रेणी, १ सय २० लिष्ट ए र ७७ टि२० आई खेलेका छन् ।

प्रथम श्रेणीमा ८ शतक र १६ अर्धशतक सहित कुल ३ हजार ३ सय ७९ रन बनाएका छन् । उत्कृष्ट प्रदर्शन १ सय ५१ रन छ । लिष्ट ए मा ७ शतक र ३२ अर्धशतक सहित कुल ४ हजार ५ सय ५ रन बनाएका छन् । लिष्ट ए मा ३ शतक र ५ अर्धशतक सहित कुल १ हजार ५ सय ६५ रन जोडेका छन् ।