एजेन्सी – आइसिसी टि२० विश्वकप २०२१ मा आज सुपर १२ को समूह १ को खेलमा अष्ट्रेलियाले बंगलादेशसँग खेल्दैछ । खेल नेपाली समय अनुसार दिउँसो ३ : ४५ मा दुबई इन्टरनेशल क्रिकेट स्टेडियममा सुरु हुनेछ ।

बंगलादेश सुरुवाती ४ खेलमा लगातार हारका साथ सेमिफाइनल दौडबाट बाहिरि सकेको छ । अष्ट्रेलियालाई शीर्ष दुईमा रहेर सेमिफाइनल खेल्न आजको खेलमा फराकिलो जितको आवश्यक पर्छ । अष्ट्रेलियाले पहिलो खेलमा दक्षिण अफ्रिकालाई ५ विकेट र श्रीलंकालाई ७ विकेटले हराएको थियो । इंग्ल्यान्डसँग ८ विकेटले हारेको थियो ।

अष्ट्रेलियाले इंग्ल्यान्डसँगको खेलमा कमजोर ब्याटिङका साथ हार बेहोरेको थियो । उक्त खेलमा फिन्चले ४९ बलमा ४४ रन बनाएका थिए । अन्य कुनैपनि ब्याटरले राम्रो प्रदर्शन गर्न सकेका थिएनन् । डेविड वार्नर, ग्लेन म्याक्सवेल र स्टिभ स्मिथलाई जिम्मेवारीका साथ ठूलो इनिङ खेल्न आवश्यक देखिन्छ ।

विकेटकिपर म्याथ्यु वेडको स्थानमा अष्ट्रेलियाले जोश इंगलिसलाई मौका दिनसक्छ । स्टिभ स्मिथलाई बेन्चमा राखेर मिचेल मार्शलाई मौका दिनसक्छ । स्मिथले अपेक्षा अनुसार प्रदर्शन गर्न सकेका छैनन् । मार्कस स्टोइनिसलाई तल्लोक्रममा आफ्नो शैलीको खेल खेल्न आवश्यक छ । तीव्र गतिका बलर प्याट कमिन्स, मिचेल स्टार्क र जोश हेजलवुड अष्ट्रेलिया बलिङ आक्रामण हुन् । स्पिनर एडम जाम्पाले लगातार विकेटका साथ राम्रो प्रदर्शन गर्दै आएका छन् ।

बंगलादेश अन्तिम खेलमा जितका साथ विश्वकप सकाउन चाहन्छ । सुपर १२ मा बंगलादेश पहिलो खेलमा श्रीलंकासँग ५ विकेट, इंग्ल्यान्डसँग ८ विकेट, वेस्टइन्डिजसँग ३ रन र दक्षिण अफ्रिकासँग ६ विकेटले पराजित हुँदै बाहिरिएको थियो । पहिलो समूह चरणमा बंगलादेश स्कटल्यान्डसँग ६ रनले स्तब्ध भएको थियो ।

पछिल्लो खेलमा दक्षिण अफ्रिकाविरुद्ध बंगलादेश ८४ रनमा अल आउट भएको थियो । बंगलादेशले यस विश्वकपमा निकै कमजोर ब्याटिङ गर्दै आएको छ । शीर्षक्रमका ब्याटर मोहम्मद नईम, लिटन दास र सौम्य सरकारलाई राम्रो सुरुवात दिन आवश्यक छ । कमजोर ओपनिङको कारण पनि ब्याटिङमा दबाबमा पर्दै आएको छ । मुश्फिकुर रहिमले मध्यक्रम सम्हाल्नेछन् । महमुदूल्लाह रियाद र अफिफ हुसैन फिनिसरको रुपमा छन् ।

तस्किन अहमद र शोरिफुल ईस्लाम प्रमुख तीव्र गतिका बलर हुन् । नासुम अहमद र माहेदी हसन स्पिनर हुन् । यी दुबै स्पिनर तल्लोक्रममा राम्रो ब्याटिङको क्षमता राख्न सक्छन् । स्पिनर सकिब अल हसन चोटका कारण बाहिरिएका छन् । प्रमुख खेलाडी टोलीमा नहुँदा बंगलादेश समस्यामा छ ।

अष्ट्रेलिया ३ खेलमा २ मा जित र १ खेलमा हारका साथ ४ अंक जोड्दै तेस्रो स्थानमा छ । इंग्ल्यान्डको सेमिफाइनल स्थान पक्का भएको छ । दक्षिण अफ्रिका ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । अष्ट्रेलिया र दक्षिण अफ्रिका दुबै ८–८ अंकको साथमा सेमिफाइनल खेल्ने सोचमा छन् ।

जसमा नेरनरेट निर्णायक बन्न सक्छ । अष्ट्रेलिया नेटरनरेट माइनस ०.६२७ र दक्षिण अफ्रिका प्लस ०.७४२ छ । अष्ट्रेलियाले अन्तिम खेलमा शुक्रबार वेस्टइन्डिजसँग खेल्नेछ । दक्षिण अफ्रिकाले पनि शनिबार इंग्ल्यान्डसँग खेल्नेछ । दक्षिण अफ्रिका अन्तिम खेलमा पराजित भएमा अष्ट्रेलियालाई सहज हुनेछ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । इंग्ल्यान्ड सेमिफाइनलमा पुगि सकेको छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंकका साथ दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ४ खेलमा ४ मानै पराजित हुँदै पुछारमा छ । श्रीलंका र बंगलादेश बाहिरि सकेका छन् ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । पाकिस्तान सेमिफाइनलमा पुगि सकेको छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड ३ खेलमा २ मा जित र १ मा हार सहित नेटरनरेटको आधारमा तेस्रो स्थानमा छ । नामिबिया ३ खेलमा १ मा जित र २ मा हार सहित पाँचौं स्थानमा छ । भारत ३ खेलमा १ मा जित र २ मा हारका साथ चौथो स्थानमा छ । स्कटल्यान्ड सुरुवाती ३ खेलमा हारका साथ बाहिरिएको छ ।