धादिङ (हाम्रो खेलकुद) – गजुरी सामुदायिक समाज विकास टिमले प्रथम धादिङ जिल्ला टि२० क्रिकेट प्रतियोगिता उपाधि जितेको छ । बिहीबार भएको फाइनलमा गजुरीले त्रिपुरासुन्दरीलाई २१ रनले हराउदै उपाधि जितेको थियो । योसँगै च्याम्पियन गजुरीले १ लाख र उपविजेता त्रिपुरासुन्दरीले ५० हजार रुपैयाँ प्राप्त गरेका छन् ।

विशालटारको चन्द्रोदय बहुमुखी क्याम्पसको खेल मैदानमा टस जितेर ब्याटिङका रोजेको गजुरीले २० ओभरमा १ सय १० रनमा अल आउट भएको थियो । गजुरीका सविन उप्रेतीले ३४ बलमा ३ चौका सहित सर्वाधिक २८ रनको योगदान दिए । शुरेन्द्र मगरले २६ बलमा १ चौका र २ छक्का प्रहार गर्दै २६ रन बनाए । गजुरीका ६ ब्याटर रन आउट हुन पुगेका थिए । फाइनलको दबाबमा गजुरीका ब्याटर क्रिजमा सम्हालिन सकेका थिएनन् । बलियो लक्ष्यको धुनमा तालमेल नमिल्दा रन आउट हुन पुगेका थिए ।

त्रिपुरासुन्दरीका मध्य गतिका बलर अनिल अधिकारी ४ ओभरमा १७ खर्चेर २ विकेट लिए । श्रीकृष्ण र उदय थापाले भने सम्मान १(१ विकेट लिए । जितको लागि १ सय ११ रनको विजयी लक्ष्य पछ्याएको त्रिपुरासुन्दरीले २० ओभरमा ९ विकेट गुमाउँदै ८९ रन मात्र बनाउन सक्यो । त्रिपुरा सुन्दरीका उदय थापाले २५ बलमा २१ रन बनाए ।

गजुरीका मध्य गतिका बलर सानु घले ४ ओभरमा ९ रन खर्चेर घातक बलिङ गर्दै ३ विकेट लिएपछि गजुरी च्याम्पियन बनेको थियो । खेलको प्लेयर अफ द म्याच पनि घले चुनिए । प्रदीप गिरी र सक्षम खरेलले सम्मान २र२ विकेट लिए । प्रतियोगिताको उत्कृष्ट ब्याटर अमृत थापा भए । फाइनलमा पुर्याउन अमृतले ५ खेलमा २ सय ३७ रन बनाएका थिए ।

प्रतियोगिता सर्वोत्कृष्ट खेलाडी र उत्कृष्ट बलर गजुरीका उज्वल थापा घोषित भए । गजुरीलाई उपाधि जिताउन उनले प्रतियोगिताभर सर्वोत्कृष्ट अलराउन्ड प्रदर्शन गरेका थिए । जसक्रममा उनले सेमिफाइनलमाा चरौन्दीविरुद्ध शतक प्रहार गरेका थिए । उनी यस प्रतियोगितामा शतक प्रहार गर्ने पहिलो खेलाडी हुन् । त्यस्तै उनले एकै खेलमा हाम्रो जनहित युवा समाजविरुद्ध एक्लै ८ विकेट लिएका थिए । उनले रु १० हजार प्राप्त गरे । उनले प्रतियोगिताभर २ सय ६० रन बनाउनुको साथैं १६ विकेट लिएका थिए ।

गजुरीकै गजुरीका सक्षम खरेलले युवा उदीयमान खेलाडी घोषित भए । उनले प्रतियोगितामा ५ विकेट लिँदै राम्रो प्रभाव छाडेका थिए । प्रतियोगितामा जिल्लाका १४ टिमको सहभागिता थियो । धादिङ जिल्ला क्रिकेट संघको आयोजनामा पहिलो पटक जिल्ला स्तरिय प्रतियोतियोगिता आयोजना भएको थियो । प्रतियोगिता मुख्य प्रायोजक निलकण्ड नगरपालिका, बेनीघाट रोराङ गाउँपालिका, टोयटा कम्पनी र अन्तर्राष्ट्रिय धादिङ समाजले प्रतियोगिता मुख्य प्रायोजन गरेका थिए ।