एजेन्सी – साविक विजेता वेस्टइन्डिज टि२० विश्वकप २०२१ मा समूह चरणबाटै बाहिरिएको छ । सुपर १२ को समूह १ मा रहेको वेस्टइन्डिज श्रीलंकासँग २० रनले पराजित हुँदै समूह चरणबाटै बाहिरिएको छ । दुई पटकको च्याम्पियन वेस्टइन्डिज खराब प्रदर्शनका साथ समूह चरणबाटै बाहिरिएको छ ।

जितको लागि १ सय ९० रनको विजयी लक्ष्य पछ्याएको वेस्टइन्डिजले २० ओभरमा ८ विकेट गुमाउँदै १ सय ६९ रन बनायो । वेस्टइन्डिजका लागि युवा ब्याटर शिम्रन हेटमायरले ५४ बलमा ८ चौका र ४ छक्का सहित सर्वाधिक ८१ रनको उत्कृष्ट अविजित इनिङ खेलेपनि टोलीको हार टार्न सकेनन् । अन्य ब्याटरले खराब प्रदर्शन गरेपछि हेटमायरको उत्कृष्ट प्रदर्शनका बाबजुद वेस्टइन्डिज पराजित भएको छ ।

निकोलस पुरनले ३४ बलमा ६ चौका र १ छक्का सहित ४६ रनमा आउट भए । क्रिस गेल १, इविन लुईस ८, रोश्टन ९ र आन्द्रे रसेल २ रनमा आउट भए । काइरन पोलार्ड शून्य, जेसन होल्डर ८ र ड्वेन ब्राभोले २ रनमा आउट भए । श्रीलंका स्पिनर वान्दिुन हसरंगाले ४ ओभरमा १९ रन खर्चेर २ विकेट लिए । चामिका करुणारत्ने ४ ओभरमा ४३ रन खर्चेर २ विकेट लिए । बिनुरा फर्नान्डो २, दुश्मन्था चामिरा र दासुन शनकाले १–१ विकेट लिए ।

त्यसअघि शेख जायद स्टेडियम आबूधाबीमा टस हारेर ब्याटिङ थालेको श्रीलंकाले निर्धारित २० ओभरमा ३ विकेट गुमाउँदै १ सय ८९ रन बनाएको थियो । श्रीलंकाका चरिथ असलंकाले ४१ बलमा ८ चौका र १ छक्का सहित सर्वाधिक ६८ रनको योगदान दिए । ओपनर पाथुम निसांकाले ४१ बलमा ५ चौका सहित ५१ रन बनाए ।

कप्तान दासुन शनकाले १४ बलमा २ चौका र १ छक्का सहित २५ रनमा अविजित रहे । वेस्टइन्डिजका आन्द्रे रसेलले ४ ओभरमा ३३ रन खर्चेर २ विकेट लिए । ड्वेन ब्राभोले ४ ओभरमा ४१ रन खर्चेर १ विकेट लिएका थिए । वेस्टइन्डिज पहिलो खेलमा इंग्ल्यान्डसँग ६ विकेट र दोस्रो खेलमा दक्षिण अफ्रिकासँग ८ विकेटले हारेको थियो । तेस्रो खेलमा बंगलादेशलाई ३ रनले हराउँदै झिनो आशा कायमै राखेको थियो । तर यस हारले अघिल्लो चरण समाप्त बनेको छ ।

अन्तिम खेलमा अष्ट्रेलियासँग शनिबार खेल्नेछ । उक्त खेलमा विजयी भएमा अष्ट्रेलिया सेमिफाइनलमा पुग्ने बलियो समिकरण छ । तर दक्षिण अफ्रिकाले त्यसै दिन इंग्ल्यान्डलाई हराएको खण्डमा भने नेटरनरेटको आधारमा एक टोली सेमिफाइनलमा पुग्नेछन् । इंग्ल्यान्डको सेमिफाइनल पक्का बनि सकेको छ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । इंग्ल्यान्ड सेमिफाइनलमा पुगि सकेको छ । अष्ट्रेलिया ४ खेलमा ३ मा जित र १ मा हार सहित ६ अंकका साथ तेस्रो स्थानमा छ । अष्ट्रेलियाको नेटरनरेट प्लस १.०३१ छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंक भएपनि रनरेटका कारण तेस्रो स्थानमा छ । दक्षिण अफ्रिकाको नेटरनरेट प्लस ०.७४२ छ । श्रीलंका ५ खेलमा २ मा जित र ३ मा हार सहित चौथो स्थानमा रहेर बाहिरिएको छ । वेस्टइन्डिज ४ खेलमा १ मा जित र ३ मा हार सहित पाँचौ स्थानमा रहेर बाहिरिएको छ। बंगलादेश ५ खेलमा ५ मानै हारका साथ बाहिरि सकेको छ ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । पाकिस्तान सेमिफाइनलमा पुगि सकेको छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड ३ खेलमा २ मा जित र १ मा हार सहित नेटरनरेटको आधारमा तेस्रो स्थानमा छ । नामिबिया ३ खेलमा १ मा जित र २ मा हार सहित पाँचौं स्थानमा छ । भारत ३ खेलमा १ मा जित र २ मा हारका साथ चौथो स्थानमा छ । स्कटल्यान्ड सुरुवाती ३ खेलमा हारका साथ बाहिरिएको छ ।