एजेन्सी – न्युजिल्यान्डले आइसिसी टि२० विश्वकप २०२१ सुपर १२ को खेलमा नामिबियालाई १ सय ६४ रनको बलियो लक्ष्य दिएको छ ।
शारजाह क्रिकेट स्टेडियममा टस हारेर ब्याटिङ थालेको न्युजिल्यान्डले निर्धारित २० ओभरमा ४ विकेट गुमाउँदै १ सय ६३ रन बनायो ।

न्युजिल्यान्डका ग्लेन फिलिप्स २१ बलमा १ चौका र ३ छक्का सहित सर्वाधिक ३९ रन अविजित रहे । जेम्श निसम २३ बलमा १ चौका र २ छक्का सहित ३५ रनमा अविजित रहे । पाँचौं विकेटका लागि फिलिप्स र निसमले ३६ बलमा ७६ रनको अविजित उत्कृष्ट साझेदारी गरेपछि न्युजिल्यान्ड बलियो योगफलमा पुगेको थियो ।

ओपनर मार्टिन गुप्टिल १८ बलमा १ चौका र १ छक्का सहित १८ रनमा आउट भए । पाँचौं ओभरको पहिलो बलमा डेविड विसेले गुप्टिललाई क्याच गराएका थिए । सातौं ओभरको दोस्रो बलमा मिचेल डर्याल १९ रनमा क्याच आउट भए । मिचेल डर्यालले १५ बलमा २ चौका प्रहार गरे ।
कप्तान गेरहार्ड इरास्मसले १३ औं ओभरको पहिलो बलमा केन विलियम्सनलाई २८ रनमा बोल्ड आउट गरे । विलियम्सनले २५ बलमा २ चौका र १ छक्का प्रहार गरे ।

डेभन कन्वे १७ रनमा रन आउट भए । एक समय १४ ओभरमा ८७–४ को कमजोर अवस्थामा पुगेको थियो । त्यसपछि फिलिप्स र निसमले उत्कृष्ट ब्याटिङका साथ न्युजिल्यान्डलाई बलियो योगफलमा पुर्याएका थिए । नामिबियाका बर्नार्ड शोल्ट्ज, डेविड विसे र गेरहार्ड इरास्मसले १–१ विकेट लिए ।