एजेन्सी – स्पिनर रविन्द्र जडेजा र तीव्र गतिका बलर मोहम्मद शामीको उत्कृष्ट बलिङको सहयोगमा आइसिसी टि२० विश्वकप २०२१ को सुपर १२ को खेलमा स्कटल्यान्डले भारतलाई ८६ रनको सामान्य विजयी लक्ष्य दिएको छ ।

दुबई इन्टरनेशल क्रिकेट स्टेडियममा टस हारेर ब्याटिङ थालेको स्कटल्यान्ड १७.४ ओभरमा ८५ रनमा अल आउट भयो । स्कटल्यान्डका ओपनर जर्ज मुन्शेले १९ बलमा ४ चौका र १ छक्का सहित सर्वाधिक २४ रन बनाए । कलुम म्याकलड १६ र माइकल लिस्क २१ रनमा आउट भए ।

तीव्र गतिका बलर जस्प्रित बुमराहले तेस्रो ओभरको तेस्रो बलमा ओपनर तथा कप्तान काइल कोट्जरलाई १ रनमा बोल्ड आउट गरे । छैटौं ओभरको दोस्रो बलमा तीव्र गतिका बलर मोहम्मद शामीले मुन्शेलाई हार्दिक पान्ड्याबाट क्याच गराएपछि स्कटल्यान्डले रन जोड्न संघर्ष गरेको थियो । त्यसपछि स्पिनर रविन्द्र जडेजाले स्कटल्यान्डको ब्याटिङक्रम धरासय बनाएका थिए ।

रिची बेरिंगटनलाई जडेजाले शून्यमा बोल्ड आउट गरे । सातौं ओभरको अन्तिम बलमा म्याथ्यु क्रसलाई एलबीडब्लू आउट गरेपछि स्कटल्यान्ड समस्यामा परेको थियो । जडेजालेनै आक्रामक ब्याटिङ गरेका माइकल लिस्कलाई २१ रनमा एलबीडब्लू आउट भएपछि मध्यम योगफलको सम्भावना पनि टाढिएको थियो । लिस्कले १२ बलमा २ चौका र १ छक्का प्रहार गरे । मार्क वाटले १३ बलमा २ चौका सहित १४ रन बनाए ।

भारतका स्पिनर रविन्द्र जडेजाले ४ ओभरमा १५ रन खर्चेर ३ विकेट लिए । तीव्र गतिका बलर मोहम्मद शामीले ३ ओभरमा १ मेडन सहित १५ रन खर्चेर ३ विकेट लिए । जस्प्रित बुमराहले ३.४ ओभरमा १ मेडन सहित १० रन खर्चेर २ विकेट लिए । रविचन्द्रन आश्विनको नाममा १ विकेट रह्यो ।