काठमाडौं (हाम्रो खेलकुद)– नेपाली महिला टोली एभिसी सेन्ट्रल जोनको च्याम्पियन बने पनि पुरुष टोली भने पदक विहिन बनेको छ । बंगलादेशमा जारी च्याम्पियनसिपको मंगलबार भएको तेस्रो स्थानको प्रतिस्पर्धामा उज्वेकिस्तानसँग ३–० ले पराजित हुँदै नेपाल पदक विहिन भएको थियो ।

उज्वेकिस्तानले नेपाललाई २५–१५,२५–१७,२५–२२ ले हराएको थियो । दुई वर्षअघि स्वदेशमा भएको च्याम्पियनसिपमा नेपाल समूह चरणबाटै बाहिरिएको थियो । यसपटक भने पदकका लागि प्रतिस्पर्धा गरेपनि अन्त्यमा असफल भएको थियो । राउन्ड रोविनमा उज्वेकिस्तानमाथि जित हासिल गरेपनि पदकको भिडन्तमा भने असफल भएको छ ।

पाँच वर्षअघि माल्दिभ्समा भएको सोहि प्रतियोगितामा भने नेपाल कास्य पदक जितेको थियो । त्यो नेपाली पुरुष भलिबल टोलीले जितेको पहिलो पदक थियो । ४ दशक भन्दा लामो नेपालको अन्तर्राष्ट्रिय यात्रामा त्यो एक मात्र पदक हो ।

राउन्ड रोविनमा श्रीलंका र बंगलादेश पराजित नेपालले उज्वेकिस्तान र माल्दिभ्सलाई हराउँदै कास्य पदकका लागि प्रतिस्पर्धा गरेको थियो । मंगलबार नै उज्वेकिस्तानलाई ३–२ ले हराउँदै महिला टोलीले च्याम्पियनसिपको उपाधि रक्षा गरेको थियो ।