काठमाडौं (हाम्रो खेलकुद) – नेपाल भलिबल संघकी केन्द्रिय सदस्य सुश्री ज्योति केसीले अक्षय कोष सँगै उदियमान खेलाडीका लागि पुरस्कार स्थापना गरेकी छिन् ।

गत वर्ष बंगलादेशमा सम्पन्न सेन्ट्रल जोनमा नेपाली महिला भलिबल टोली च्याम्पियन बन्दा ज्योति केसी व्यवस्थापक थिइन् । विजेता टोलीलाई सरकारले प्रदान गरेको २ लाख रुपैयाँमा आफ्नो व्यक्तिगत १ लाख रुपैयाँ थप गरि केसीले अक्षयकोष स्थापना गरेकी हुन् । हाललाई तीन लाख रुपैयाँको अक्षयकोष स्थापना गरिएको छ । अक्षयकोषमा संस्थापक केसीसँगै सदस्यहरु देवराज राई र सुनिल राई रहेका छन् ।

अक्षयकोषबाट प्राप्त ब्याजबाट हरेक वर्ष नेपाल भलिबल संघद्वारा आयोजना गरिने एनभीए लिग पुरुष तथा महिला भलिवल खेलका उदीयमान पुरुष तथा महिला खेलाडीलाई जनही दश हजार रुपैया पुरस्कार प्रदान गरिने छ । आउने दिनमा यस अक्षयकोषलाई भविष्यमा थप वृद्धि गर्दै लगिने केसीले जनाएकी छिन् ।

यस अक्षयकोषबाट प्रदान गरिने पुरस्कारको नाम “ज्योति केसी नव प्रतिभा पुरस्कार” रहेको छ । यस अतिरिक्त अक्षय कोषबाट भलिबल खेलाडीहरुलाई आवश्यकता परेमा शिक्षा तथा स्वास्थ्य क्षेत्रमा पनि आर्थिक सहयोग गरिने उनले जानकारी दिइन् । भलिबलबाहेक अन्य सामाजिक क्षेत्रमा पनि केसी सक्रिय रहँदै आएकी छिन् ।