विराटनगर (हाम्रो खेलकुद) – नेपाली सेनाका रविना महर्जन र स्वेच्छा नेम्वाङको जोडीले सातौं राष्ट्रिय खेलकुदमा टेबल टेनिस उमन्स डबल्समा स्वर्ण पदक जितेका छन् । मेन्स डबल्सको स्वर्ण पदक नेपाल पुलिसका प्रदीप रोक्का र विनेश खनियाँको जोडीले जितेको छ ।
पूर्वाञ्चलमा जारी राष्ट्रिय खेलकुदको दोस्रो दिन आइतबार रविना र स्वेच्छाको जोडीले फाइनलमा पुलिसका नविता श्रेष्ठ र एलिना महर्जनको जोडीलाई ७–११, ११–७, ११–६, ७–११ र ११–३ ले हराउँदै पहिलो स्थान प्राप्त गरेको हो । एपिएफका शेलिषा र सोनु तथा आर्मीका दिक्षा र सिक्काको जोडीले कांस्यमा पदक प्राप्त गर्यो ।
मेन्स डबल्सको फाइनलमा प्रदीप रोक्का र विनेशको जोडीले एपिएफका शिवसुन्दर गोथे र अमरलाल मल्लको जोडीलाई ११–९, ११–९, ३–११ र ११–९ ले हराएको थियो । पुलिसका दीप साउन र स्यान्टु श्रेष्ठ तथा पुरुषोत्तम र चन्दन शाहीले कास्य पदक जित्यो ।
शहिद रंगशालास्थित कभर्डहलमा भएको उमन्स र मेन्स दुवै टिम ईभेन्टस्मा पुलिसले स्वर्ण पदक जितेको छ । पुलिसले दुवै फाइनलमा अर्को विभागिय टोली एपिएफलाई ३–१ ले पराजित गरेको थियो । आर्मी र मध्यमाञ्चलले कास्य पदक जिते । मेन्समा मध्यमाञ्चल र पूर्वाञ्चलले कास्य पदक जित्यो ।
मिक्स डबल्समा पुलिसका स्यान्टु श्रेष्ठ र एलिना महर्जनको जोडी र दीप साउन र नविताको जोडी फाइनल प्रवेश गरेको छ । स्यान्टु र एलिनाको जोडीले सेमिफाइनलमा आर्मीका कृष्ण र रविना महर्जनको जोडीलाई ११–८, ११–७ र ११–७ ले हरायो । दीप र नविताको जोडीले एपिएफका पुरुषोत्तम र सोनुको जोडीलाई ६–११, ११–४, ११–४, ८–११ र ११–८ ले पराजित गर्दै फाइनलको यात्रा तय गरेको थियो ।
