एजेन्सी – स्पेनिस युवा विंगर अन्सु फाती चम्कँदा यो सिजनको स्पेनिस ला लिगाको च्याम्पियन बनिसकेको क्याटलान क्लब बार्सिलोनाले सानदार जित हात पारेको छ ।

बार्सिलोनाले घरेलु मैदानमा १० खेलाडीमा समेटिएको रियल मलोर्कामाथि ३–० को सहज जित हात पारेको हो । बार्सिलोनाका जितमा अन्सु फातीले दुई तथा पाब्लो गाभीले एक गोल गरे ।

स्पोटिफाई क्याम्प नोउमा आइतबार राति भएको खेलको पहिलो मिनेटमा नै फातीको गोलबाट बार्सिलोना अघि बढेको थियो । उनले गाभीको पासमा गोल गर्न सफल भएका थिए ।

१४औं मिनेटमा मलोर्का १० खेलाडीमा समेटिन पुग्यो । एमाथ डिआए सिधैं रातो कार्ड खाँदै मैदानबाट बाहिरिदा बार्सिलोनालाई थप सहज स्थिति बन्यो ।

२४औं मिनेटमा फातीले व्यक्तिगत र टोलीका लागि दोस्रो गोल गर्दै बार्सिलोनाको अग्रता दोब्बर पारे । उनले रोबर्ट लेवान्डोस्कीको पासमा गोल गर्न सफल भएका थिए ।

त्यसपछि ७०औं मिनेटमा गाभीले गोल गर्दै बार्सिलोनाको सहज जित पक्का गराए । गाभीले र्आसमाने डेम्वेलेको पासमा गोल गर्न सफल भएका थिए ।

यस जितले च्याम्पियन बनिसकेको बार्सिलोनाको ३७ खेलबाट ८८ अंक पुगेको छ । मलोर्का ४७ अंक जोडेर १२औं स्थानमा छ ।

अन्य नतिजा
अल्मेरियाविरुद्ध रियल भालाडोलिड (०–०)
एथलेटिको बिल्वाओविरुद्ध इल्चे (०–१)
एट्लेटिको मड्रिडविरुद्ध रियल सोसिडाड (२–१)
क्याडिजविरुद्ध सेल्टा डि भिगो (१–०)
गेटाफेविरुद्ध ओसासुना (२–१)
जिरोनाविरुद्ध रियल बेटिस (१–२)
रायो भालेकानोविरुद्ध भिल्लारियल (२–१)
भ्यालेन्सियाविरुद्ध इस्पान्योल (२–२)