काठमाडौं (हाम्रो खेलकुद) – न्यू डायमण्ड स्पोर्ट्स क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा गण्डकी प्रदेशलाई सोझो सेटमा पराजित गर्दै विजयी सुरुवात गरेको छ ।

आफ्नो पहिलो खेलमा न्यू डायमण्डले गण्डकीमाथि २५-१७, २५-१६ र २५-१५ को जित हात पारेको हो । नियमित कप्तान ललिता नाथले यसअघिनै अव भलिबल खेल नखेल्ने जनाएकी थिइन् । न्यू डायमण्डको कप्तानी प्रतिभा मालीले गरेकी थिइन् ।

मालीको यो पूनरागमन खेल थियो । तर माली पहिलो सेटपछि पुन कोर्ट प्रवेश गरिनन् । युवा खेलाडीलाई मैदान उतारेको थियो । उता अरुणा शाहीको कप्तानीमा रहेको गण्डकीले केहि प्रतिस्पर्धा गरेको थियो ।

न्यु डायमण्डले सोमबार बिहान १० बजे एभरेष्ट भलिबल क्लबसँग खेल्नेछ । उता गण्डकी पहिलो खेलमा नेपाल पुलिस क्लबसँग ३-० को सोझो सेटमा पराजित भएको थियो । आजको अन्तिम खेलमा नेपाल पुलिस क्लब र एभरेष्ट क्लबबीच प्रतिस्पर्धा हुँदैछ ।

पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल टेक्निकल सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् ।