काठमाडौं (हाम्रो खेलकुद) – होङ्गान्जी न्यू डायमण्ड स्पोर्ट्स क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा लगातार दोस्रो जित हात पारेको छ । न्यु डायमण्डले एभरेष्ट भलिबल ट्रेनिङ सेन्टरमाथि ३–० को सोझो सेटमा जित हात पारेको हो ।

राष्ट्रिय खेलकुद परिषद् (राखेप) को कभर्डहलमा सोमबार विहान भएको दोस्रो खेलमा न्यू डायमण्डले २५-१७, २५-१२ र २५-१२ को सहज जित हात पारेको हो । पहिलो सेटमा एभरेष्टले ४-१ को अग्रता लिएको थियो ।

न्यू डायमण्डले ७-७ को अवस्थामा बराबरी गरेको थियो । ९-९ को बराबरी अवस्थाबाट प्रतिभा मालीले सर्भिसमा लगातार ९ अंक जोड्दै जितको आधार तय गरेकी थिइन् ।

तेस्रो सेटमा पनि न्यू डायमण्डले ७-० को अग्रता लिँदै सहज जितको आधार तय गर्यो । न्यू डायमण्डको जितमा युवा खेलाडी सुमित्रा रेग्मी केल्मि प्लेयर द म्याच चुनिन् । आजनै गएको पहिलो खेलमा नेपाल एपिएफ क्लबले गण्डकी प्रदेशमाथि २५–१२, २५–१८ र २५–८ को सोझो सेटमा जित हात पारेको थियो ।

आज तेस्रो खेलमा दिउँसो १२ बजे महिलातर्फ पुलिस र आर्मी भिड्नेछन् । पुरुषतर्फ आजको खेलमा दिउँसो २ बजे हेल्प नेपाल र दावाली मिलन, दोस्रो खेलमा दिउँसो ४ बजे आर्मी र गण्डकी तथा दिनको अन्तिम खेलमा पुलिस र शैलुङ बागढुङ्गाबीच प्रतिस्पर्धा हुनेछ ।

पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल ट्रेनिङ सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् ।