काठमाडौं (हाम्रो खेलकुद) – नेपालका युवा ब्याटर अर्जुन कुमालले एसिसी यू–१९ एसिया कपमा अफगानिस्तानविरुद्ध अर्धशतक प्रहार गरेका छन् । अर्जुन ७९ बलमा ६ चौकासहित ५५ र सुवास भण्डारी क्रिजा छन् । जितको लागि २ सय ६२ रनको विजयी लक्ष्य पछ्याएको नेपालले ३१ ओभरा ७ विकेट गुमाउँदै १ सय ४२ रन बनाएको छ ।

नेपालले ओपनर विपिन रावललाई शून्यमा गुमाएको थियो । दीपक बोहरा १३ बलमा ३ चौकासहित १५ रनमा क्याच आउट भए । फरिदुन दावुदजाईको बलमा नौमान अघाबाट दीपक क्याच आउट भएका थिए । कप्तान देव खनाल ३७ बलमा २ चौकासहित २४ रनमा क्याच आउट भए । उत्तम थापामगर ४ र आकाश त्रिपाठी शून्यमा आउट भएपछि नेपाल समस्यामा परेको थियो ।
गुलशन झा २० बलमा २ छक्कासहित १७ रनमा क्याच आउट भए ।

त्यसअघि आइसिसी एकेडेमी ओभल–२ दुबईमा टस हारेर पहिला ब्याटिङको निम्तो पाएको अफगानिस्तान ४९.३ ओभरमा २ सय ६१ रनमा अल आउट भएको थियो ।

अफगानिस्तानका जाम्शिद जद्रानले १ सय ५२ बलमा ८ चौकासहित १ सय ६ रनको शतकीय इनिङ खेलेका थिए । उनी खुट्टामा समस्याका कारण रिटायर्ड हर्ट भएका थिए ।

त्यस्तै नौमान साह अघाले ४१ बलमा ५ चौका र ३ छक्कासहित ६० रनको आक्रामक इनिङ खेलेका थिए । पाँचौं विकेटका लागि नौमानले जम्शिद जद्रानसँग ८२ बलमा ९७ रनको उत्कृष्ट साझेदारी गर्दै अफगानिस्तानलाई बलियो योगफलमा पुर्याएका थिए ।