काठमाडौँ (हाम्रो खेलकुद) – चिनियाँ नयाँ वर्षको अवसरमा नेपाली युवा टोली र चिनियाँ किङ्घाइ प्रान्तको युशु युवा टोली बीच आज मैत्रीपुर्ण खेल हुँदै छ । खेल नेपाली समय अनुसार दिनको ३ बजे दशरथ रंगशालामा सुरु हुने छ ।

टोलीलाई प्रशिक्षण गरिरहेका राष्ट्रिय टोलीका मुख्य प्रशिक्षक भिन्सेन्जो अल्बर्टो एनेसेले २३ सदस्सीय युवा टोली घोषणा गरिसकेका छन् । टोलीमा राष्ट्रिय टोलीका नियमित सदस्य रहेका आयुष घलान, मनिष डाँगी, उत्सव राई र लाकेन लिम्बू जस्ता खेलाडीहरु पनि रहेका छन् ।नेपाली टोलीको कप्तानी मनिष डाँगीले गर्ने छन् । 

खेल अगाडि चिनियाँ ड्रागन शो, मार्सल आर्ट शो लगायत अन्य कार्यक्रम समेत रहेको एन्फाले जनाएको छ । 

एन्फाले टिकट मूल्य समेत निर्धारण गरिसकेको छ । साधारण तर्फ टिकटदर रु ३०० र भिआईपि तर्फ रु ५०० निर्धारण गरिएको छ । टिकट खरिद गर्ने दुई जना भाग्यशाली दर्शकका लागि काठमाडौँ-ल्हसा-काठमाडौँको हवाई टिकट समेत प्रदान गरिने एन्फा जानकारी दिएको छ । 

नेपालस्थित चीनको दूतावास, राष्ट्रिय खेलकुद परिषद् र नेपाल पर्यटन बोर्डले संयुक्त रुपमा मैत्रीपूर्ण खेल आयोजना गर्न लागेको हो । मैत्रीपूर्ण खेलको आयोजक अखिल नेपाल फुटबल संघ र नेपाल ओभरसिज चाइनिज एसोसिएसन रहने छन् ।

नेपाली टोली:

गोलकिपर: पूजन होना, विशाल सुनार, सन्तोष महत

डिफेन्डर: पदम भट्टराई, अजय चौधरी, एन्जल महर्जन, छिरिङ लामा, योगेश गुरुङ, आशिक बाबु, सुमित श्रेष्ठ, विशाल बस्नेत

मिडफिल्डर: आयुष घलान, प्रशान्त लक्सम, उत्सव राई, लाकेन लिम्बू, सन्तोष खत्री, रोहन कार्की, चन्दन कुमार, कुशल देउवा

फरवार्ड: समिर तामाङ, सन्जीव विष्ट, निराजन धामी, मनिष डाँगी