काठमाडौं (हाम्रो खेलकुद) – दुई विभागिय टोली नेपाल एपिएफ क्लब र नेपाल पुलिस क्लब सातौं केएनपी नेरोलेक महिला भलिबल प्रतियोगिताको उपाधिका लागि आज एकअर्काको सामना गर्दैछ ।

त्रिपुरेश्वरस्थित राष्ट्रिय खेलकुद कभर्डहलमा जारी प्रतियोगितामा शनिबार दिउँसो २ः०० बजे एपिएफले पुलिसको सामना गर्नेछ । साविक विजेता चन्द्रागिरी नगरपालिका न्यु डायमण्ड महिला टोली भने यसपटक फाइनल पुग्नबाट असफल रह्यो ।

लिग चरणको तेस्रो तथा अन्तिम खेलमा न्यु डायमण्डलाई ३–२ को सेटले हराउँदै एपिएफ फाइनल पुगेको थियो । गत वर्ष न्यु डायमण्ड र एपिएफबीच फाइनल भएको थियो ।

प्रतियोगिताको पहिलो दिन लिग चरणको खेलमा एपिएफले पुलिसलाई ३–१ ले हराएको थियो । सोही दिनको पहिलो खेलमा त्रिभुवन आर्मी क्लबलाई ३–१ ले हराउँदै न्यु डायमण्डले जितबाट यात्रा सुरु गरेको थियो ।

एपिएफसँग पहिलो खेल गुमाएपनि त्यसपछि न्यु डायमण्ड र आर्मीलाई हराउँदै पुलिस अन्तिम दुईमा पुगेको थियो । आज दिउँसो १२ः०० बजे आर्मी र डायमण्डबीच तेस्रो स्थानको प्रतिस्पर्धा हुनेछ ।

प्रतियोगिताको विजेताले ४ लाख ९९ हजार र दोश्रो टोलीले २ लाख ५० हजार रुपैयाँ पाउनेछन्। तेस्रो हुनेले १ लाख २५ हजार र चौथो हुने टोलीले ६२ हजार रुपैयाँ प्राप्त गर्नेछन्।

प्रतियोगिताको सर्वोत्कृष्ट खेलाडीले ५० हजार रुपैयाँ प्राप्त गर्नेछिन् । विधागततर्फ उत्कृष्ट हुनेलाई २५ हजार रुपैयाँ प्राप्त गर्नेछन् ।