लेस्टर (एजेन्सी)–म्यानचेस्टर युनाइटेडले प्रिमियर लिगमा अपराजित यात्रालाई १५ खेलसम्म पुर्याउने क्रममा आइतबार साविक विजेता लेस्टरमाथि ३–० को सहज जित हासिल गरेको छ । हेन्रिक मखिटारियन, ज्लाटान इब्राहिमोभिक र हुँवा माटाको गोलमा टोलीले जित निकालेको थियो ।

सुरुआतमा बराबरीको टक्कर देखिएको खेलमा विस्तारै युनाइटेडले नियन्त्रण बनाउँदै लगेको थियो । मार्कोस रसफोर्डको प्रहारलाई लेस्टरका गोलकिपर कास्पर सेचमिचेलले रोकेका थिए । तर, मखिटारियनले ४२ औं मिनेटमा गोल गर्दै युनाइटेडलाई अघि बढाए । त्यसको दुई मिनेट बित्न नपाउँदै इब्राहिमोभिकले गोल गरे । प्रिमियर लिगमा एकै सिजन १५ गोल गर्नेमा उनी सबैभन्दा पाका खेलाडी पनि बनेका छन् । दोस्रो हाफको चौथो मिनेटमा माटाले अर्को गोल गर्दै युनाइटेडको जितलाई सहज बनाएका थिए ।

जितका वावजुद युनाइटेड (४५ अंक) लिग तालिकाको छैटौं स्थानमा यथावत छ । टोली पाँचौं स्थानको लिभरपुलभन्दा १ अंकले पछाडी छ । आइतबार नै स्वान्सी सिटीलाई २–१ ले हराउँदै म्यानचेस्टर सिटी तेस्रो स्थानमा उक्लेको छ । शीर्षस्थानको चेल्सीको ५९, दोस्रो स्थानको टोटेनह्यामको ५०, सिटीको ४९, चौथो स्थानको आर्सनलको ४७ अंक छ । लेस्टर १६ औं स्थानमा छ भने टोलीको रेलिगेसन क्षेत्रमा रहेका टोलीको भन्दा १ अंकमात्र बढी छ ।