पाथिभारा (हाम्रो खेलकुद)– दुई विभागिय टोली त्रिभुवन आर्मी क्लब र नेपाल पुलिस क्लबबीच दोस्रो पाथिभारा राष्ट्रिय खुला पुरुष भलिबल प्रतियोगिताका लागि शनिबार प्रतिस्पर्धा हुने भएको छ ।
फोटो–आर्मी सेतो पोशाक र एपीएफबीचको खेल ।
राउण्ड रबिनको पद्धतीबाट संचालन गरिएको प्रतियोगिताको समिकरणले आर्मी र पुलिस बीचको लिग खेल फाइनल सरह बन्न पुगेको छ । अपराजित रहेका दुवै टोलीले ३ खेलमा समान ९ अंक जोडेका छन् । शुक्रबार भएको पहिलो खेलमा आर्मीले अर्को विभागिय टोली एपिएफ क्लबलाई २६–२४, २५–१९ र २५–१७ ले हराएको थियो ।
आर्मीका लागि पहिलो सेट निकै चुनौतीपूर्ण बन्यो । निकै उतार–चढाव रहेको पहिलो सेटको सुरुवातमा आर्मीले १२–८ को अग्रता लिएको थियो । क्वीक स्पाईकर महेन्द्र श्रेष्ठको उत्कृष्ट प्रदर्शनमा खेलमा फर्किएको एपीएफले अगातार ८ अंक ल्याउदै १६–१२ को अग्रता लियो । ओपन स्पाइकरद्वय मानवहादुर श्रेष्ठ र धनवाहादुर भट्टको उत्कृष्ट प्रदर्शनमा लगातार ६ अंक जोड्दै आर्मीले १८–१६ को अग्रता लियो ।
पहिलो सेट प्वाइन्टमा पुगेको आर्मीले लगत्तै अर्को अंक जोड्न नसक्दा खेल २४–२४ को अवस्थामा पुग्यो । त्यस पश्चात लगातार २ अंक जोडेको आर्मीले २६–२४ को स्कोरमा पहिलो सेट आफ्नो नाम पार्यो । त्यसपछिका दुवै सेट लगातार जित्दै आर्मीले सफलता हात पार्यो ।
ताप्लेजुङ नगरपालिका स्थित भानु जन माबीको कोर्टमा भएको चौथो दिनको अन्तिम खेलमा अर्को बिभागिय टोली पुलिसले मध्यामञ्चललाई २५–९,२५–१६ र २५–१३ सेटले हराएको थियो । प्रतियोगितामा शनिबार हुने एपीएफ र पूर्वाञ्चलको नतिजाले प्रतियोगिताको तेस्रो टोलीको टुंगो लाग्नेछ । ३ खेलमा एपिएफको ३ तथा पूर्वाञ्चलको २ अंक छ । मध्यमाञ्चलले सबै चार खेल गुमाउँदै १ अंकमात्र जोड्यो ।
